डोंबिवली – नवरात्रोत्सवाच्या काळात अष्टमीच्या दिवशी होमात तूप टाकत असताना असताना डोंबिवली पूर्वेतील टिळकनगर मधील टिळक शाळा परिसरात राहणारी ३३ वर्षाची एक महिला पूजेसाठी बसली असताना ओढणीने पेट घेतल्याने गंभीररित्या भाजली होती. ओढणी पेटल्यानंतर या महिलेच्या अंगावरील कपडे पेटून ती गंभीररित्या भाजली होती. या महिलेचा डोंबिवलीतील एम्स रुग्णालयात उपचार सुरू असताना दोन आठवड्यांनी मृत्यू झाला.
या महिलेच्या मृत्युने टिळकनगर परिसरात हळहळ व्यक्त केली जात आहे. सरिता निरंजन ढाका (३३) असे मृत महिलेचे नाव आहे. ती पती निरंजन इंदरलाल ढाका (३६) यांच्यासह टिळकनगर मधील शिव पॅराडाईज इमारतीत राहत होती. या मृत्यूप्रकरणी सरिता यांच्या पतीच्या माहितीवरून टिळकनगर पोलिसांनी भारतीय न्याय संहितेच्या कलम १९४ प्रमाणे अकस्मित मृत्युची नोंद केली आहे.
पोलीस ठाण्यातील माहिती अशी, की निरंजन आणि सरिता ढाका राहत असलेल्या परिसरात नवरात्रोत्सवाचा उत्सव साजरा केला जात होता. सात दिवस घट, देवीची पूजा केल्यानंतर नवरात्रोत्सवातील आठव्या दिवशी अष्टमीला देवीला होम हवन केले जाते. साग्रसंगीत नैवद्य दाखविला जातो. या होम हवन पूजेसाठी सरिता निरंजन ढाका बसल्या होत्या. होमामध्ये समिधा, शेण गोवऱ्या, होम यज्ञ कुंड धगधगण्यासाठी तूप टाकले जात होते.
होमाच्या बाजूला पुजेसाठी बसल्यावर सरिता ढाका यांनी आपल्या गळ्यातील ओढणी देवीचा मान म्हणून डोक्यावर घेतली होती. डोक्यावर ओढणी घेऊन त्या होमामध्ये समिधा, हवनासाठी आवश्यक वस्तू टाकत होत्या. होमातील शेण गोवऱ्या तूप टाकल्यामुळे धगधगत होत्या. सरिता यांनी एका क्षणी उठून होम कुंडामध्ये हातामधील चमच्याने तूपाची धार टाकण्याचा प्रयत्न केला. यावेळी पेटलेल्या शेण गोवऱ्या तूपाच्या धारेमुळे धगधगून पेटून त्याची ज्वाला वरच्या दिशेने आली. त्याचवेळी सरिता यांच्या डोक्यावरील ओढणी होम कुंडाच्या दिशेन पडून तलम असलेल्या ओढणीने पेट घेतला.
ओढणीची आग सरिता यांच्या सर्वांगाला पसरली. इतर नागरिकांनी तात्काळ हालचाली करून सरिता यांच्या सर्वांगाला लागलेली आग विझविण्याचा प्रयत्न केला. तरीही त्यांचे बहुतांशी शरीर भाजले होते. त्यांना तात्काळ डोंबिवली एमआयडीसीतील एम्स रुग्णालयात नेण्यात आले. तेथे दोन आठवड्यानंतर सोमवारी सकाळी उपचार सुरू असताना त्यांचा मृत्यू झाला.
साहाय्यक पोलीस निरीक्षक ए. व्ही. विसपुते याप्रकरणाचा तपास करत आहेत.