ठाणे : शहरांमध्ये लावण्यात येत असलेले अनधिकृत होर्डिंग्ज, जाहिरात फलक, पोस्टर्स, फ्लेक्सेस, बॅनर्स, आर्चेस (कमानी) बाबत मौखिक व एसएमएसद्वारे नागरिकांना तक्रारी करण्याकरिता महापालिकांना टोल फ्री क्रमांक व भ्रमणध्वनी सुविधा सुरू करण्याचे आदेश उच्च न्यायलयाने दिले होते. त्यानुसार ठाणे महानगरपालिकेने टोल फ्री क्रमांक 1800-222-108, भ्रमणध्वनी क्रमांक 7506946155 व ट्विटरसुविधा सुरु केली असल्याची माहिती अतिक्रमण नियंत्रण व निष्कासन विभागातर्फे देण्यात आली आहे.
ठाणे महानगरपालिका क्षेत्रात अनधिकृत होर्डिंग्ज, जाहिरात फलक, फ्लेक्सेस, बॅनर्स, आर्चेस (कमानी) आदींमुळे शहराचे विद्रुपीकरण होत असल्याचे दिसून आल्यास नागरिकांनी त्या संदर्भातील तक्रारी टोल फ्री क्रमांक 1800-222-108, भ्रमणध्वनी क्रमांक 7506946155 व ट्विटरसुविधेद्वारे तक्रारी करुन ठाणे शहर अनधिकृत होर्डिंग्ज, जाहिरात फलक, पोस्टर्स, फ्लेक्सेस, बॅनर्स, आर्चेसमुक्त करण्यासाठी सहकार्य करण्याचे आवाहन करण्यात आले आहे.
ठाणे महानगरपालिका क्षेत्रात अनधिकृतपणे लावण्यात येणाऱ्या होर्डिंग्ज, जाहिरात फलक, फ्लेक्सेस, बॅनर्स, आर्चेसवर ठाणे महानगरपालिकेकडून कारवाई करण्यात येणार आहे. तसेच संबंधितांवर दि महाराष्ट्र प्रिव्हेंशन ऑफ डिफेसमेंट ऑफ प्रॉपर्टी ॲक्ट 1995 नुसार गुन्हे दाखल करण्यात येणार आहे, असेही अतिक्रमण नियंत्रण व निष्कासन विभागाने म्हटले आहे.