आपले विचार हे आपले भवितव्य आणि आपले व्यक्तिमत्व घडवतात. त्यामुळे पालक आणि शिक्षक नेहमी आपल्या पाल्यावर आणि विद्यार्थ्यांवर चांगले संस्कार करतात. चांगल्या विचार त्यांच्या मनावर बिंबवतात. बालमनावर रूजलेले विचार कायम लक्षात राहतात. लहानपणी मुलांमधील सर्जनशीलता वाढवण्याचा प्रयत्न शिक्षक नेहमी करतात. लहानपणी शाळेत तुम्ही अनेकदा निबंध लिहिले असतील? हो ना…माझी शाळा, माझी आई, माझा आवडता खेळ. हे अगदी साधे विषय असतात जे तुमच्या आवडी निवडी, तुमच्या आवडत्या व्यक्ती किंवा ठिकाण याबाबत तुम्हाला काय वाटते हे व्यक्त करणारे हे विषय पण काही विषय अत्यंत मजेशीर असतात जे तुमच्या कल्पनाशक्तीवर जोर द्यायला भाग पाडतात जसे की, जर शाळा बंद पडली तर, जर पाऊस पडलाच नाही तर , जर सूर्य उगवलाच नाही तर…. असे विषय विद्यार्थ्यांना त्यांच्या सर्जनशीलता वाढवण्यासाठी उपयोगी ठरतात. सध्या अशाच एका विषयावर एका चिमुकल्याने निबंध लिहिला आहे ज्याचा फोटो सोशल मीडियावर तुफान व्हायरल होत आहे. निंबध वाचून तुम्ही पोट धरून हसाल. नेटकऱ्यांना देखील हा निंबध खूप आवडला आहे.
व्हायरल फोटामध्ये माणसांना पंख असते तर या विषयावर निबंध लिहिला आहे. खरं तर या निबंधामध्ये माणसाला जर पक्ष्यांसारखे पंख असते तर अशी कल्पना करून निबंध लिहिणे अपेक्षित होते पण चिमुकल्याने मात्र वेगळ्याच दृष्टिकोनातून हा विषय मांडला आहे.
माणसांना पंख असते तर माणूस हवेत उडू शकला असता. पण या चिमुकल्याने माणसे उडतात याचा वेगळाच अर्थ लावून निंबध लिहिलेला आहे जो वाचून नेटकऱ्यांना त्याचं हसू आवरणे अशक्य होत आहे.
चिमुकल्याचा निंबध
माणसांना पंख असते तर…!
आजकाल आपण समाजात बघतो की, माणसांना पंख नसताना देखील ते दुसऱ्यांवर उडतात. माणसांना जर खरोखर पंख असते तर ते दुसऱ्यांवर जास्त उडाले असते. आशा आहे की समाजातील हे कटु सत्या मी या निंबधतात लिहिल्यामुळे सर तुम्ही माझ्यावर उडणार नाही.”
या निंबधात चिमुकल्याने उडतात हा शब्दप्रयोग माणसं एकमेकांवर चिडतात हे सांगण्यासाठी केला आहे. जर सतत एकमेकांवर चिडणाऱ्या या माणसांना खरचं पख असते तर त्यांनी काय केले असते हे सांगण्याचा प्रयत्न त्याने केला आहे. चिमुकल्याचा हटके विचार सरांना कदाचित आवडला असावा त्यामुळे त्याला १० पैकी १० गुण दिल्याचे लाल शाईने लिहिलेले दिसत आहे.
हा निंबध वाचून नेटकरी मात्र खळखळून हसत आहे. हा फोटो pcmc_kar’s आणि kothrudkarpune’s नावाच्या पेजवर शेअर केला आहे. फोटो शेअर करताना “या निबंधाला तुम्ही किती मार्क्स द्याल? “असा प्रश्नही विचारला आहे. ज्याचे उत्तर देताना नेटकऱ्यांनी लिहिले की, “सुंदर हस्ताक्षरासाठी १० मार्क जास्तीचे द्या”
अनेकांनी चिमुकल्याच्या मताशी सहमती दर्शवली तर काहींनी हा चिमुकला ‘पुणेरी कारटा’ आहे असे म्हटले.
तुम्हाला चिमुकल्याचा निंबध कसा वाटला?
© IE Online Media Services (P) Ltd