ट्विटर हा असा सोशल मीडिया प्लॅटफॉर्म आहे जिथे कधी कोणत्या गोष्टी ट्रेण्ड होतील सांगता येत नाही, मग त्या राजकारणाशी संबंधित असो वा मनोरंजनाशी असोत. ट्विटरवर एकदा का कोणती गोष्ट ट्रेण्ड झाली की युजर्स एकापाठोपाठ एक ट्वीट करण्यास सुरुवात करतात. जेव्हा देशात किंवा जगात एखादे प्रकरण तापते तेव्हा त्याचे पडसाद ट्विटरवरही पाहायला मिळतात. तुम्ही अनेकदा पाहिले असेल की, एखाद्या नेत्याचा किंवा अभिनेत्याचा वाढदिवस असेल किंवा एखाद्या दिवशी काही खास घटना घडली असेल तर त्या नेत्याचे नाव, अभिनेत्याचे नाव किंवा त्या घटनेशीसंबंधित वेगवेगळ्या हॅशटॅगसह ट्विटरवर ट्रेण्डिंग सुरू होते. यात एखाद्या प्रसिद्ध व्यक्तीचे निधन झाले तरी ते ट्विटरवर ट्रेण्ड सुरू होते, म्हणजेच संपूर्ण जगात काहीही झाले तरी ते ट्विटरवर काही वेळात व्हायरल होते. यात ट्विटरवर सध्या #MeAt19 खूप ट्रेण्ड करीत आहे. या हॅशटॅगसह लोक त्यांचे जुने फोटो शेअर करीत आहेत.
युजर्स या ट्रेण्डच्या माध्यमातून वयाच्या १९ व्या वर्षी ते कसे दिसायचे, ते फोटोंच्या माध्यमातून जगाला दाखवण्याचा प्रयत्न करीत आहेत. पण काही युजर्सकडे वयाच्या १९ व्या वर्षी त्यांनी स्वत:चे काढलेले फोटो नाहीत म्हणून त्यांना खूप वाईट वाटत आहे. यात काही युजर्स म्हणतात की, ‘आम्ही १९-२३ वर्षांचे होतो तेव्हा कॅमेरा फोन नव्हते, असे मोबाइलही नव्हते. तरीही आम्ही वयाच्या १९ किंवा २३ व्या वर्षी काढलेले फोटो शोधत आहोत. ट्विटरवर मोठी स्पर्धा सुरू आहे,’ तर काही युजर्स म्हणतात की, ‘२०-२१ वर्षांची मुलेही #MeAt19 वर फोटो पोस्ट करीत आहेत. काही तरी विचार करा.’ तर अनेकांनी त्यावेळी आम्ही बेरोजगार होतो अशाप्रकारच्या मजेशीर कमेंट्स केल्या आहेत.