मिरा रोड येथे मंदिराच्या अनधिकृत बांधकामावर कारवाई

मिरा रोड येथील गोकुळ व्हिलेज परिसरात ‘श्री गोपाळ लालमंदिर ‘मंदिर आहे. या मंदिरात अनेक स्थानिक नगरिक हजेरी लावत असतात. मात्र हे मंदिर सोसायटीच्या आर.जी ( रिक्रेशन गार्डन )जागेवर उभारण्यात आले असल्याचा दावा अनेक वर्षांपासून करण्यात येत आहे. विकासकाने परस्पर ही जागा धार्मिक संस्थेच्या हाती दिल्यामुळे हा वाद उभा राहिला आहे. त्यामुळे या विरोधात सोसायटीमधील पदाधिकारी बऱ्याच वर्षांपासून महापालिका, जिल्हाधिकाऱ्यांकडे तक्रारी करत होते. यावर दाद मिळत नसल्याने अखेर न्यायालयात खटला दाखल करण्यात आला होता. त्यावरून मंदिरामधील अनधिकृत बांधकामावर कारवाई करण्याचे आदेश न्यालयाने दिले होते.परंतु महापालिकेकडून यावर कारवाई करण्याकडे दिरंगाई केली जात होती.

हे ही वाचा… नायगाव मध्ये प्लायवूड कारखान्याला भीषण आग, कारखान्यातील साहित्य जळून खाक

हे ही वाचा… पालिकेच्या पेल्हार प्रभाग समितीच्या कार्यालयाला आग

दरम्यान हे प्रकरण पेटू लागल्यानंतर शुक्रवारी महापालिकेच्या अतिक्रमण विभागाने मोठा पोलिस बंदोबस्त घेऊन मंदिरावर कारवाई केली.यावेळी प्रशासनाच्या कारवाईचा विरोध करण्यासाठी अनेकजण एकवटले होते.काहींनी कारवाईला विरोध केल्यामुळे पोलिसांनी शासकीय कामात अडथळा निर्माण केल्याप्रकरणी आठ ते नऊ जणांवर गुन्हा नोंदवण्याची प्रक्रिया हाती घेतली असल्याची माहिती उपायुक्त प्रकाश गायकवाड यांनी दिली आहे. तर मंदिराचे जीने आणि काही भागच अनधिकृत असल्याने ते तोडण्यात आले असल्याची माहिती अतिक्रमण विभागाचे मुख्य अधिकारी नरेंद्र चव्हाण यांनी दिली आहे.