वसई: वसई महापालिकेच्या आगामी निवडणुकीसाठी ११ नोव्हेंबर रोजी आरक्षणाची सोडत काढण्यात येणार आहे. आरक्षण निश्चित करण्यासाठी सोडतीचा कार्यक्रम जाहीर करण्यात आला आहे. विरार पश्चिम येथील पालिकेच्या मुख्यालयात आरक्षण सोडत काढण्यात येणार आहे. यासाठी महापालिका प्रशासन सज्ज झाले आहे.
राज्य निवडणूक आयोगाने दिलेल्या मार्गदर्शक सुचनेनुसार वसई विरार शहर महानगरपालिका सार्वत्रिक निवडणुकीसाठी अनुसूचित जाती (महिला), अनुसूचित जमाती (महिला), नागरिकांचा मागासवर्ग प्रवर्ग, नागरिकांचा मागासवर्ग प्रवर्ग (महिला) व सर्वसाधारण महिलांसाठी आरक्षण निश्चिती करण्यासाठी सोडत काढण्यात येणार आहे.
विरार पश्चिम येथील महापालिकेच्या मुख्यालयातील दुसऱ्या मजल्यावर ११ नोव्हेंबर रोजी सकाळी ११ वाजता ही सोडत आयोजित करण्यात आली आहे. त्यानंतर, सोमवारी १७ नोव्हेंबर रोजी आरक्षणाचे प्रारुप प्रसिद्ध करण्यात येईल. तर, १७ ते २४ नोव्हेंबर पर्यंत आरक्षण प्रारुपावर हरकती व सूचना सादर करता येतील. दाखल झालेल्या हरकती व सूचना विचारात घेऊन आरक्षणाची अंतिम अधिसूचना प्रसिद्ध करण्यात येणार असल्याचे पालिकेने सांगितले आहे.
वसई विरार महापालिकेत २९ प्रभाग असून ११५ सदस्य संख्या आहे. यापैकी ३१ जागा नागरिकांच्या मागास प्रवर्ग ( ओबीसी) करिता राखीव ठेवण्यात आल्या आहेत. अनुसूचित जाती( एससी)आणि अनुसूचित जमाती ( एसटी) या प्रवर्गासाठी प्रत्येकी पाच जागा आरक्षित करण्यात आल्या आहेत. ७४ जागा या सर्वसाधारण प्रवर्गाकरिता राखीव राहणार असून ११५ पैकी ५८ जागा महिलांसाठी राखीव असणार आहेत.
आरक्षण सोडतीकडे साऱ्यांचे लक्ष
आगामी महापालिका निवडणुकीसाठी राजकीय पक्षांची मोर्चे बांधणी सुरू करण्यात आली आहे. दुसरीकडे निवडणूक लढविण्यासाठी आधीपासूनच इच्छुकांनी तयारी सुरू केली होती कोणत्या प्रभागात नेमके कोणते आरक्षण पडेल याकडे सर्वांचे लक्ष लागले आहे.