मुंबई : केंद्र सरकारने वस्तू-सेवा करामध्ये कपात केल्याने त्याचा परिणाम वाहन खरेदीवर झाला. दसऱ्याच्या मुहूर्तावर गुरुवारी मुंबई, ठाण्यात मोठ्या प्रमाणात दुचाकी, चारचाकी वाहनांची खरेदी झाली. गेल्या वर्षी दसऱ्याला ९,०६३ वाहनांची खरेदी झाली होती, मात्र यंदा १०,५४१ वाहनांची खरेदी करण्यात आली आहे.
छोट्या चारचाकी वाहनांवर जीएसटी कमी केल्याने ग्राहकांना सर्वाधिक फायदा झाला. यापूर्वी १२०० सीसी आणि ४ मीटरपेक्षा कमी लांबीच्या पेट्रोल आणि सीएनजी चारचाकीवर २८ टक्के जीएसटी आणि १ टक्के सेस आकारला जात होता. म्हणजेच एकूण २९ टक्के कर होता, जो सरकारने १८ टक्के केला. ३५० सीसीपेक्षा कमी क्षमतेच्या दुचाकींवरील जीएसटी दर २८ टक्क्यांवरून १८ टक्क्यांपर्यंत कमी केला. त्यामुळे चारचाकी आणि दुचाकी खरेदीत वाढ झाली.
यावर्षी ताडदेव, वडाळा, अंधेरी, बोरिवली या चार आरटीओ विभागातून सुमारे ७,५७९ दुचाकी आणि २,९६२ चारचाकी वाहनांची नोंदणी करण्यात आली. यंदा नागरिकांचा विद्युत चारचाकी वाहन खरेदीकडे सर्वाधिक कल होता, अशी माहिती परिवहन विभागातून देण्यात आली.
मुंबईत किती वाहन खरेदी?
आरटीओ-दुचाकी-चारचाकी
ताडदेव-२,२४३-८३५
वडाळा-१,६८७-७२३
अंधेरी-१,२८५-५५४
बोरिवली-२,३६४-८५०