Operation Sindoor Updates: पाकिस्तानच्या गोळीबारात पूंछ जिल्ह्याच्या गुरुद्वारातील तिघांचा मृत्यू, अकाली दलाचा निषेध

गायक सोनू निगमनं ऑपरेशन सिंदूरनंतर सोशल मीडियावर पोस्ट केली आहे. “घर में घुसकर मारा है, कब्र तुम्हारी खोदी है, भारत की गद्दी पर बैठा, बाप तुम्हाला मोदी है… समझे बेटा पाकिस्तान”, असं या पोस्टमध्ये सोनू निगमनं लिहिलं आहे.

ऑपरेशन सिंदूर अंतर्गत पाकिस्तानच्या हद्दीत घुसून ९ ठिकाणी एअर स्ट्राईक करण्यात भारताच्या हवाई दलाच्या शूर अधिकाऱ्यांचा व जवानांचा समावेश होता. ही मोहीम यशस्वीपणे पार पाडल्यानंतर सर्व भारतीय अधिकारी व जवान सुखरूपपणे परतले आहेत.

ऑपरेशन सिंदूरनंतर पाकिस्ताननंदेखील भारतीय हद्दीत श्रीनगर हवाई तळावर एअर स्ट्राईक केल्याचे व्हिडीओ सोशल मीडियावर व्हायरल होत आहेत. मात्र, असा कोणताही एअर स्ट्राईक भारतावर झालेला नसल्याचं पीआयबीनं फॅक्ट चेकच्या माध्यमातून स्पष्ट केलं आहे.

१) बहावलपूर
२) मुरिदके
३) गुलपूर
४) भीमबर
५) चक अमरु
६) बाग
७) कोटली
८) सियालकोट
९) मुजफ्फराबाद

भारतानं ऑपरेशन सिंदूरमार्फत पाकिस्तानमधील दहशतवादी तळांवर एअर स्ट्राईक केल्यानंतर भारताकडून अमेरिकेला माहिती देण्यात आली आहे. त्यासंदर्भात मार्को रुबियो यांनी सोशल मीडियावर पोस्ट केली आहे. “मी भारत व पाकिस्तानमधील स्थितीवर लक्ष ठेवून आहे. मी आशा करतो की हे सगळं लवकर संपावं. या सर्व प्रकरणावर शांततापूर्ण मार्गाने उपाय शोधण्यासाठी भारत व पाकिस्तानच्या नेतृत्वाशी मी चर्चा करत राहीन”, अशी पोस्ट अमेरिकेचे परराष्ट्र मंत्री मार्को रुबियो यांनी केली आहे.

पाकिस्ताननं शस्त्रसंधीचं उल्लंघन केल्याची पोस्ट भारतीय लष्करानं पहाटे २ वाजून ४२ मिनिटांनी सोशल मीडियावर केली आहे. पूंछमधल्या भीमबर गली परिसरात हा गोळीबार झाल्याची माहिती यात देण्यात आली आहे.

भारतानं ऑपरेशन सिंदूर अंतर्गत पाकिस्तानवर एअर स्ट्राईक केल्यानंतर पाकिस्ताननंही उत्तरादाखल प्रत्यक्ष नियंत्रण रेषा अर्थात LOC वर गोळीबार सुरू केला आहे. जम्मू-काश्मीर मधील राजौरी व पूंछ जिल्ह्याच्या सीमेवर पाकिस्तानकडून गोळीबार करण्यात आला आहे. पाकिस्तानकडून शस्त्रसंधीचं उल्लंघन करण्यात आल्यानंतर भारताकडून त्याला चोख प्रत्युत्तर देण्यात आलं आहे.

भाजपा खासदार मनोज तिवारी यांनी एक व्हिडीओ सोशल मीडियावर शेअर केला आहे. हा व्हिडीओ भारतानं पाकिस्तानच्या हद्दीत शिरून ऑपरेशन सिंदूर अंतर्गत केलेल्या एअर स्ट्राईकचा असल्याचा दावा त्यांनी केला आहे. “२२ एप्रिल – मोदी को बता देना? ७ मे – मोदी ने बता दिया” अशी सूचक पोस्टही त्यांनी केली आहे.

उत्तर प्रदेशचे मुख्यमंत्री योगी आदित्यनाथ यांनी “जय हिंद, जय हिंद की सेना” असं म्हणत ऑपरेशन सिंदूरबद्दल सोशल पोस्ट केली आहे.

भारतीय हवाई दलानं पाकिस्तानवर केलेल्या एअर स्ट्राईकनंतर देशाच्या संरक्षण मंत्र्यांनी फक्त ‘भारत माता की जय’ एवढीच पोस्ट सोशल मीडियावर केली आहे. मध्यरात्री २ वाजून ४६ मिनिटांनी राजनाथ सिंह यांनी ही पोस्ट केली आहे.

भारतानं ‘ऑपरेशन सिंदूर’ दरम्यान केलेल्या एअर स्ट्राईकमध्ये कोणत्याही सामान्य पाकिस्तानी नागरिकाला लक्ष्य करण्यात आलं नव्हतं. शिवाय, पाकिस्तानी लष्करावर देखील हा हल्ला करण्यात आला नव्हता. या हल्ल्यात फक्त दहशतवादी तळांनाच लक्ष्य करण्यात आलं होतं. यात लष्कर ए तैय्यबा, जैश ए मोहम्मद यासारख्या दहशतवादी संघटनांशी संंबधित तळांना लक्ष्य करण्यात आलं.

भारतीय हवाई दलानं पहाटे १ वाजून ४४ मिनिटांनी पाकिस्तानवर एअर स्ट्राईक केला. यात पाकिस्तानच्या हद्दीतील एकूण ९ दहशतवादी तळांना लक्ष्य करण्यात आलं. या मोहिमेला भारताकडून ‘ऑपरेशन सिंदूर’ असं नाव देण्यात आलं आहे.