कोलकाता उच्च न्यायालायचे न्यायाधीश आणि भाजपाचे उमेदवार अभिजीत गंगोपाध्याय यांनी पश्चिम बंगालच्या मुख्यमंत्री आणि तृणमूल काँग्रेसच्या प्रमुख ममता बॅनर्जी यांच्याबाबत अतिशय वादग्रस्त असे विधान केले आहे. गंगोपाध्याय मिदनापूर जिल्ह्यातील एका जाहीर सभेत बोलत असताना म्हणाले, “भाजपाच्या संदेशखालीमधील उमेदवार रेखा पात्रा यांना दोन रुपयांना विकत घेतले आहे, असा आरोप तृणमूल काँग्रेस करत आहे. मग मला विचारायचे आहे की, ममता बॅनर्जी यांची किंमत काय आहे, १० लाख रुपये का?” गंगोपाध्याय यांच्या विधानानंतर आता तृणमूल काँग्रेसने आक्रमक पवित्रा घेतला असून निवडणूक आयोगाकडे तक्रार दाखल केली आहे. लोकसभा निवडणूक जाहीर होण्याच्या काही दिवस आधी गंगोपाध्याय यांनी न्यायाधीशपदाचा राजीनामा दिला होता. ते पश्चिम बंगालच्या तामलुक मतदारसंघातून निवडणूक लढवत आहेत.

अभिजीत गंगोपाध्याय काय म्हणाले?

जाहीर सभेला संबोधित करत असताना अभिजीत गंगोपाध्याय म्हणाले की, रेखा पात्रा यांच्याबद्दल अवमानकारक विधान तुम्ही कसे केले? कारण ममता बॅनर्जी या एका प्रसिद्ध ब्रँडकडून आपला मेकअप करून घेतात. तर रेखा पात्रा या घरकाम करतात, म्हणून तुम्ही त्यांना दोन हजारांत घेतल्याचे म्हणता का? एक महिला दुसऱ्या महिलेशी इतक्या अपमानास्पद पद्धतीने कसे काय बोलू शकते? असा सवाल गंगोपाध्याय यांनी उपस्थित केला.

मराठीतील सर्व निवडणूक २०२४ बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: What is your price rs 10 lakh ex judge and bjp leader abhijit gangopadhyay remark sparks row kvg
First published on: 17-05-2024 at 12:50 IST