Ambati Rayudu’s decision to play in CPL 2023 : भारत आणि चेन्नई सुपर किंग्जचा (सीएसके) माजी फलंदाज अंबाती रायुडूने सेंट किट्स अँड नेव्हिस पॅट्रिओट्ससोबत करार केला आहे, ज्यामुळे तो कॅरिबियन प्रीमियर लीग (सीपीएल) मध्ये सहभागी होणारा देशातील दुसरा खेळाडू बनला आहे. अंबाती रायुडू आयपीएल २०२३ मध्ये चेन्नई सुपर किंग्ज कडून खेळला होता. ईएसपीएनक्रिकइंफोच्या माहितीनुसार, अंबाती रायुडूला सेंट किट्स आणि नेव्हिस पॅट्रियट्स संघाकडून ‘मार्की’ खेळाडू म्हणून करारबद्ध केले आहे.
आयपीएल २०२३ नंतर, ३७ वर्षीय खेळाडूने अमेरिकेतील सीएसकेच्याच्या मेजर क्रिकेट लीग (एमएलसी) साठी टेक्सास सुपर किंग्ज (टीएसके) या फ्रँचायझीशी करार केल्याचे उघड झाले होते. तथापि, रायडूने एमएलसीमध्ये सहभागी न होण्याचा निर्णय घेतला. कारण भारतीय क्रिकेट नियामक मंडळाने (बीसीसीआय) निवृत्तीनंतर लगेचच खेळाडूंना परदेशी लीगमध्ये सहभागी होण्यापासून रोखण्यासाठी ‘कूलिंग ऑफ पीरियड’ धोरण लागू करण्याचा विचार करत असल्याचे जाहीर केले होते. मात्र, बीसीसीआयने अद्याप यावर निर्णय घेतलेला नाही.
अंबाती रायुडूला सामन्यात खेळण्याची संधी मिळाल्यास, तो सीपीएलमध्ये खेळणारा प्रवीण तांबेनंतरचा दुसरा भारतीय खेळाडू ठरेल. अंबाती रायुडू हा ६ वर्षे भारतीय क्रिकेट संघाचा भाग होता. पण तो या दरम्यान सतत टीम इंडियामध्ये आत-बाहेर होत राहिला. २०१९ च्या विश्वचषक स्पर्धेत तो भारतीय संघाचा एक भाग म्हणून दिसला होता. पण शेवटच्या प्रसंगी निवडकर्त्यांनी त्याला विश्वचषक संघात स्थान दिले नाही आणि त्याच्या जागी थ्रीडी खेळाडूची निवड करण्याबाबत सांगितले.
यापूर्वी रायुडू भारतीय संघासाठी चौथ्या क्रमांकावर दिसत होता. मात्र निवडकर्त्यांनी त्याचे पत्ता कट केला. मात्र, नंतर निवडकर्त्यांचा हा निर्णय चुकीचा ठरला आणि जेव्हा टीम इंडिया वर्ल्ड कपच्या सेमीफायनलमध्ये पराभूत होऊन स्पर्धेतून बाहेर पडली, तेव्हा चौथ्या क्रमांकाची अस्थिरता हे संघाच्या पराभवाचे मुख्य कारण मानले गेले. यावेळीही भारत चौथ्या क्रमांकावरील फलंदाज शोधत आहे. श्रेयस अय्यरच्या दुखापतीमुळे संघ अडचणीत दिसत आहे.