India vs South Africa Test Match Score 2nd Test Day 2: भारत आणि दक्षिण अफ्रिकेमधील दुसऱ्या कसोटी सामन्यात भारतीय गोलंदाज शार्दुल ठाकूरने भेदक गोलंदाजी केली. शार्दुलने या इनिंगमध्ये एकूण ७ विकेट घेतल्या आहेत. दुसरीकडे दक्षिण अफ्रिकेचा संघही मैदानात पाय रोवून उभा राहिला. अफ्रिकेने २२९ धावा करत भारताच्या २०२ धावांचा टप्पा ओलांडला. यासह अफ्रिकेने २७ धावांची आघाडी घेतली. दुसऱ्या इनिंगला उतरलेल्या भारतीय संघाने दुसरा दिवस अखेर २ विकेट गमावत ८५ धावा केल्या. त्यामुळे आता भारताला ५८ धावांची आघाडी मिळाली.
३ कसोटी सामन्यांच्या मालिकेतील हा दुसरा सामना जोहान्सबर्गच्या वांडरर्स मैदानावर खेळला जात आहे. आज (४ जानेवारी ) खेळाचा दुसरा दिवस आहे. पहिल्या दिवसाचा खेळ संपला तेव्हा दक्षिण अफ्रिकेने १८ षटकांमध्ये एक विकेट गमावत ३५ धावा केल्या होत्या. दुसऱ्या दिवशी अफ्रिकेने सर्वबाद २७ धावांची आघाडी घेतली आणि मग दुसऱ्या इनिंगला सुरुवात झाली. त्यात भारताने ८५ धावा करत ५८ धावांची आघाडी घेतली.
भारतीय संघाची पहिली इनिंग
प्रथम फलंदाजी करायला आलेल्या भारतीय संघाकडून कर्णधार के. एल. राहुलने सर्वाधिक ५० धावा केल्या. दुसरीकडे रवीचंद्रन अश्विनने ४६ धावांची खेळी केली. दक्षिण अफ्रिकेच्या मार्को यानसनने ४, डुआने ओलीविअर आणि कगिसो रबाडाने प्रत्येकी ३ विकेट घेतल्या.
दक्षिण अफ्रिका पहिली इनिंग
दक्षिण अफ्रिकेच्या संघातून किगन पिटरसनने ६२ धावा केल्या. याशिवाय टेंबा बावुमाने देखील ५० धावांची अर्धशतकी खेळी केली.
भारताची दुसरी इनिंग
दुसऱ्या इनिंगमध्ये भारताने २ बाद ८५ धावा केल्या. कर्णधार के. एल. राहुल ८ धावा करून बाद झाला. मयांक अगरवालला देखील केवळ २३ धावाच करता आल्या. दिवसअखेर मैदानावर चेतेश्वर पुजारा ३५ धावांवर, तर अजिंक्य रहाणे ११ धावांवर नाबाद होते.
भारतीय कसोटी संघ
के. एल. राहुल (कर्णधार), मयांक अगरवाल, चेतेश्वर पुजारा, हनुमा विहारी, अजिंक्य रहाणे, रिषभ पंत (यष्टीरक्षक), शार्दुल ठाकूर, रवीचंद्रन अश्वीन, मोहम्मद शमी, जसप्रीत बुमराह (उप कर्णधार), मोहम्मद सिराज