Ishant Sharma on Akshar Patel: इशांत शर्मा आयपीएल २०२१ नंतर तब्बल ७०० दिवसांनी सामना खेळला, या ३४ वर्षीय वेगवान गोलंदाजाने इंडियन प्रीमियर लीग २०२३ मध्ये दिल्ली कॅपिटल्ससाठी चांगली कामगिरी केली आहे. या मोसमातील पहिले पाच सामने गमावल्यानंतर दिल्लीने गेल्या दोन सामन्यांमध्ये सलग विजय नोंदवले आहेत. यामध्ये इशांतने तीन विकेट्स घेतल्या आहेत. मात्र, संघात परतण्यापूर्वीच भारतीय वेगवान गोलंदाजा इशांतची प्रकृती खालावली होती. तापामुळे त्यांना चालता येत नव्हते. याबाबत त्याने अक्षर पटेलशी संवाद साधला आहे.
दिल्ली कॅपिटल्स त्यांचा पाचवा सामना रॉयल चॅलेंजर्स बंगळुरू विरुद्ध बंगळुरू येथे खेळणार होते. दरम्यान, इशांतला तीन दिवसांपासून ताप होता. अलीकडेच दिल्ली कॅपिटल्सने शेअर केलेल्या व्हिडिओमध्ये, ३४ वर्षीय या गोलंदाजाने त्याचा सहकारी अक्षर पटेलसोबतचा एक मजेदार किस्सा शेअर केला. तो (इशांत शर्मा) बरा झाल्यावर त्याने गंमतीने अक्षरला ही सर्व हकीकत सांगितली.
इशांत शर्मा अक्षर पटेलला काय म्हणाला?
इशांत शर्मा म्हणाला, “जेव्हा मला थोडा वेळ उभे राहण्याची ताकद मिळाली, तेव्हा मी जेवणाचा ट्रे उचलला आणि तुमच्या खोलीत आलो आणि म्हणालो, “तेरे को शर्म तो आती नहीं, एक बार भी फोन नहीं किया. तुला लाज वाटत नाही, तू मला एकदाही फोन नाही केला, मी जगतोय-मरतोय, याची तुला काही पडली नाही. तू मला एकदाही विचारलं नाहीस.” यावर अक्षरने उत्तर दिले, “मी तुझ्यासाठी प्रार्थना करत होतो. माझ्या प्रार्थनेने तू सामन्यात पुनरागमन केलेस आणि तीन विकेट्स घेत चमत्कारच केला. तुला एक लाखाचे बक्षीस मिळाले आहे ते मी केलेल्या प्रार्थनेमुळेचं.” हा गंमतीशीर व्हिडिओ सोशल मीडियावर खूप व्हायरल होत आहे.
इशांत शर्माने तांत्रिक त्रुटींवर काम केले
इशांत शर्माने २०२१ साली भारतासाठी १००वी कसोटी खेळली. अक्षर पटेलही या सामन्यात खेळला होता. या अष्टपैलू खेळाडूने वेगवान गोलंदाजाच्या पुनरागमनावर आणि तो खेळत नसताना कोणत्या गोष्टींवर काम करत होता याबद्दल प्रश्न विचारला. यावर इशांतने उत्तर दिले तो म्हणाला, “मी पडद्यामागे खूप मेहनत करत होतो. इतकी वर्षे क्रिकेट खेळल्यानंतर ज्या गोष्टींसाठी मी वेळ देऊ शकलो नाही अशा गोष्टींवर मी काम केले. माझे मनगट एका बाजूला पडल्यासारखे दिसत होते. त्यामुळे चेंडू स्विंग होत नव्हता या तांत्रिक दोषांवर काम केले. आता वयानुसार मला खूप लवकर थकवा येतो. त्यामागचे कारण शोधण्याचा प्रयत्न केला. मी माझ्या गोलंदाजीबद्दल माजी वरिष्ठ खेळाडूंशी चर्चा केली. या वेळेचा मी चांगला उपयोग केला. माझी गोलंदाजी सुधारण्यासाठी आणि लय परत मिळवण्यासाठी मला या गोष्टींवर काम करावे लागले.”