LSG vs CSK: “मला का हा अवॉर्ड देताय?”, धोनीने चेन्नईच्या विजयानंतर सामनावीर ठरल्यानंतर सर्वांसमोर विचारला प्रश्न; संघाच्या विजयानंतर काय म्हणाला?

यापूर्वी गोलंदाजी करताना धोनीने विकेटमागे कमालीची विकेटकिपिंग केली. धोनीने आधी आयुष बदोनीला विकेटमागे चेंडू टिपत शानदार स्टम्पिंग केली. याशिवाय ऋषभ पंतलाही धोनीनं झेलबाद केलं. तर अखेरच्या षटकात धोनीने अब्दुलला समदला केलेलं रनआऊट कमालीचं होतं. ज्यामुळे अखेरच्या षटकात लखनौला धावा करता आल्या नाहीत.

सामन्यादरम्यान, सीएसकेचा कर्णधार महेंद्रसिंग धोनीने रवींद्र जडेजाच्या गोलंदाजीवर आयुष बदोनीला यष्टीचीत करून आयपीएलमधील त्याचा २०० वा विकेट घेतला, विकेटच्या मागे राहून २०० खेळाडूंना बाद करणारा तो पहिला आयपीएलमधील खेळाडू ठरला आहे. दिनेश कार्तिक आणि वृद्धिमान साहा या यादीत आहेत, पण ते धोनीच्या खूप मागे आहेत.

तर फलंदाजीत संघाला विजयासाठी ३० चेंडूत ५५ धावांची आवश्यकता असताना महेंद्रसिंग धोनी क्रीजवर आला. पण त्यानंतर धोनीने अशी खेळी केली की सामन्याचा रोख बदलला. त्याने फक्त ११ चेंडूत ४ चौकार आणि १ षटकारासह २६ धावांची नाबाद खेळी केली. धोनीने एकमेव षटकार एका हाताने मारला. त्याने शिवम दुबेसह २७ चेंडूत ५६ धावांची भागीदारी केली. शिवमने ३७ चेंडूत २ षटकार आणि ३ चौकारांसह ४३ धावांची नाबाद खेळी केली. सीएसकेचा हा ७ सामन्यांतील दुसरा विजय आहे. पण संघ अजूनही गुणतालिकेत अखेरच्या स्थानीच आहे.

धोनीने संघाच्या विजयानंतर संघाच्या कामगिरीवर आणि विजयाबाबत वक्तव्य केलं. फलंदाजी युनिटकडून अजून चांगल्या कामगिरीचं अपेक्षा असल्याचं धोनी म्हणाला. यानंतर धोनीला विचारण्यात आलं की, ‘तू यापूर्वी अखेरचा आयपीएलमध्ये कधी सामनावीराचा पुरस्कार जिंकला होतास आठवतंय का?’ यावर धोनी म्हणाला की, “मला आजही कळतं नाहीये की हे लोक मला का हा पुरस्कार देतायत? नूरने चांगली गोलंदाजी केली होती. जडेजाने देखील चांगली गोलंदाजी केली होती.”

धोनीने या आधी २०१९ मध्ये दिल्ली कॅपिटल्स संघाविरूद्ध अखेरचा सामनावीराचा पुरस्कार पटकावला होता. याशिवाय धोनी आयपीएलमध्ये सामनावीराचा पुरस्कार पटकावणाारा सर्वात वयस्कर खेळाडू ठरला आहे. धोनीने वयाच्या ४३ वर्षी हा पुरस्कार मिळवला.