Virat Kohli praises Yashasvi Jaiswal: आयपीएल २०२३ मधील ५६ वा सामना राजस्थाान रॉयल्स आणि कोलकाता नाईट रायडर्स संघात खेळला गेला. या सामन्यात राजस्थाानने कोलकाताचा ९ गडी राखून पराभव केला. या सामन्यात सलामीवीर यशस्वी जैस्वालने शानदार खेळी केली. जैस्वालने ४७ चेंडू, १३ चौकार आणि ५ षटकारांच्या मदतीने नाबाद ९८ धावा केल्या. या खेळीनंतर विराट कोहलीने यशस्वीचे कौतुक करताना आपली इन्स्टाग्राम स्टोरी शेअर केली आहे.
यशस्वी जैस्वालची खेळी पाहून विराट कोहलीने त्याच्या इन्स्टाग्राम अकाउंटवरून एक स्टोरी शेअर केली आहे. ज्यामध्ये कोहलीने लिहिले, “मी काही काळामध्ये पाहिलेली ही सर्वोत्तम फलंदाजी आहे. किती प्रतिभा आहे.” पुढे त्यांनी यशस्वीला त्याच्या स्टोरीत टॅगही केले. यशस्वीच्या या खेळीमुळे राजस्थानने हा सामना अगदी सहज जिंकला.
आयपीएलमधील सर्वात वेगवान अर्धशतक –
केकेआरविरुद्ध खेळल्या गेलेल्या या सामन्यात यशस्वीने आयपीएलमधील सर्वात जलद अर्धशतक झळकावण्याचा पराक्रमही केला. जैस्वालने केवळ १३ चेंडूत अर्धशतक पूर्ण केले. या प्रकरणात त्याने भारतीय फलंदाज केएल राहुल आणि ऑस्ट्रेलियन खेळाडू पॅट कमिन्सचा विक्रम मोडला. केकेआरकडून खेळताना पॅट कमिन्सने आणि पंजाब किंग्जसाठी खेळताना केएल राहुलने हा पराक्रम केला होता. आयपीएलमध्ये १४ चेंडूत सर्वात जलद अर्धशतक ठोकण्याचा विक्रम या दोन्ही खेळाडूंच्या नावावर होता. मात्र, आता हा विक्रम राजस्थान रॉयल्सच्या यशस्वी जैस्वालच्या नावावर झाला आहे.
राजस्थानने अवघ्या १३.१ षटकांत सामना जिंकला –
या सामन्यात प्रथम फलंदाजी करताना कोलकाता नाईट रायडर्स संघाने २० षटकात ८ गडी गमावून १४९ धावा केल्या. धावांचा पाठलाग करताना राजस्थान रॉयल्सने केवळ १ विकेटच्या मोबदल्यात १३.१ षटकात लक्ष्य गाठले. यशस्वी जैस्वालशिवाय कर्णधार संजू सॅमसनने २९ चेंडूंत २ चौकार आणि ५ षटकारांच्या मदतीने ४८ धावा केल्या. त्याचबरोबर युजवेंद्र चहलने ४ विकेट्स घेतल्या. तसेच तो आयपीएलमधील सर्वाधिक विकेट्स घेणारा गोलंदाज ठरला आहे.