Sachin Tendulkar congratulates Virat Kohli for equaling 49 ODI centuries record: आयसीसी एकदिवसीय विश्वचषक २०२३ स्पर्धेतील ३७ वा कोलकात्याच्या ईडन गार्डन्सवर खेळला. या सामन्यात भारत आणि दक्षिण आफ्रिका आमनेसामने आले होते. हा सामना भारतीय संघाने विराट कोहलीच्या शतकाच्या आणि रवींद्र जडेजाच्या शानदार गोलंदाजीच्या जोरावर २४३ धावांनी जिंकला. भारतीय संघाचा हा सलग आठवा विजय ठरला. या सामन्यात भारताने नाणेफेक जिंकून प्रथम फलंदाजी करताना ५ गडी गमावून ३२६ धावा केल्या होत्या. प्रत्युत्तरात दक्षिण आफ्रिकेचा संघ २७.१ षटकांत ८३ धावांवर गारद झाला.
टीम इंडियाचा स्टार फलंदाज विराट कोहलीने रविवारी दक्षिण आफ्रिकेविरुद्धच्या विश्वचषक सामन्यात १०१ धावा करत मास्टर ब्लास्टर सचिन तेंडुलकरच्या ४९ वनडे शतकांच्या विश्वविक्रमाची बरोबरी केली आहे. ही अप्रतिम कामगिरी केल्यानंतर विराट कोहलीवर अनेक माजी क्रिकेटपटू आणि चाहत्यांकडून अभिनंदनाचा वर्षाव होत आहे. पण सर्वात खास म्हणजे स्वत: सचिन तेंडुलकरने विराट कोहलीचे अभिनंदन केले.
सचिन तेंडुलकरने विराटचे केले कौतुक –
सचिन तेंडुलकरने कोहलीचे अभिनंदन करण्यासाठी ट्विटरचा वापर केला. माजी दिग्गजाने कोहलीचे ४९ व्या शतकाबद्दल केवळ अभिनंदनच केले नाही, तर त्याचा विक्रम मोडल्याबद्दल त्याला शुभेच्छाही दिल्या. सचिनने लिहिले, “विराट चांगला खेळलास. मला ४९ ते ५० पर्यंत पोहोचण्यासाठी ३६२ दिवस लागले होते. मला आशा आहे की, पुढील काही दिवसांत तू ४९ वरून ५० वर पोहोचशील आणि माझा विक्रम मोडशील. अभिनंदन!!”
३५ वा वाढदिवस साजरा करत असलेल्या विराटने ईडन गार्डनवर दक्षिण आफ्रिकेविरुद्धच्या विश्वचषक सामन्यात शतक झळकावून ही कामगिरी केली. विराटने त्याच्या वाढदिवशी सचिनच्या विश्वविक्रमाची बरोबरी केली. श्रेयस अय्यरने ७७ आणि कर्णधार रोहितने ४० धावांचे योगदान दिले. दक्षिण आफ्रिकेसाठी एडन मार्कराम वगळता सर्व गोलंदाजांनी प्रत्येकी एक विकेट घेतली.
प्रत्युत्तरात दक्षिण आफ्रिकेचा संघ केवळ ८३ धावा करू शकला. मार्को जॅन्सनने सर्वाधिक १४ धावा केल्या. त्याच्याशिवाय डुसेनने १३ आणि बावुमा-मिलरने ११-११ धावा केल्या. याशिवाय आफ्रिकेच्या एकाही फलंदाजाला दुहेरी आकडा पार करता आला नाही. भारताकडून रवींद्र जडेजाने पाच विकेट घेतल्या. मोहम्मद शमी आणि कुलदीप यादव यांना प्रत्येकी दोन विकेट्स घेतल्या. मोहम्मद सिराजने एक विकेट घेतली.