रॉयल चॅलेंजर्स बंगळुरूचा वेगवान गोलंदाज यश दयाल पुन्हा एकदा वादात सापडला आहे. जयपूरमध्ये यश दयालविरुद्ध बलात्कार आणि पॉक्सो कायद्यांतर्गत एफआयआर दाखल करण्यात आला आहे. जयपूरमधील एका तरुणीने आरोप केला आहे की यश दयालने तिला क्रिकेटमध्ये करिअर बनवण्याचे आमिष दाखवून फसवले आणि भावनिकदृष्ट्या ब्लॅकमेल करून दोन वर्षे तिचे लैंगिक शोषण केले. महिलेने तक्रार केल्यानंतर पोलिसांनी क्रिकेटपटूविरुद्ध एफआयआर नोंदवला आहे.
यश दयालवर लैंगिक शोषणाचा आरोप होण्याची ही दुसरी वेळ आहे. याआधी उत्तर प्रदेशातील गाझियाबादमधील एका मुलीने यशवर लग्नाचे आमिष दाखवून तिचे लैंगिक शोषण केल्याचा आरोप केला होता. मात्र, नंतर यश दयालला या प्रकरणात अलाहाबाद उच्च न्यायालयाकडून दिलासा मिळाला.
क्रिकेटमुळे ती मुलगी आणि यश दयाल एकमेकांच्या संपर्कात आल्याचे कळले आहे. मुलीने आरोप केला आहे की सुमारे दोन वर्षांपूर्वी ती अल्पवयीन असताना दयालने क्रिकेटमध्ये करिअर करण्याचे आमिष दाखवून तिच्यावर बलात्कार केला. यश दयाल आयपीएल २०२५ चा सामना खेळण्यासाठी जयपूरला पोहोचला होता अशी माहिती आहे. तिथेही त्याने मुलीला एका हॉटेलमध्ये बोलावून तिच्यावर बलात्कार केला, अशी माहिती समोर देण्यात आली आहे.
इमोशनल ब्लॅकमेल आणि सततच्या शोषणामुळे त्रस्त झालेल्या पीडितेने पोलिसांकडे तक्रार दाखल केली, अशी माहिती पोलिसांनी दिली. पहिल्यांदा बलात्कार झाला, तेव्हा पीडिता अल्पवयीन होती. त्यामुळे पोलिसांनी आरोपी दयालविरुद्ध पॉक्सो कायद्यानुसार एफआयआर नोंदवला आहे.
जयपूरमधील मुलीने आरोप करण्यापूर्वी गाझियाबादमधील एका मुलीने यश दयालवर लैंगिक शोषण, हिंसाचार आणि फसवणुकीचा आरोप केला होता. पीडितेने सोशल मीडियावर पोस्ट करून क्रिकेटपटूवर कारवाई करण्याची मागणी केली होती. पीडितेने उत्तर प्रदेशचे मुख्यमंत्री योगी आदित्यनाथ आणि पोलिसांकडे न्यायाची याचना केली होती. एवढंच नाही तर पीडितेने यश दयालबरोबरचा तिचा फोटोही शेअर केला होता.
पीडितेने दावा केला होता की ती यश दयालबरोबर पाच वर्षांपासून ती रिलेशनशिपमध्ये होती. यशने लग्नाचे आमिष दाखवून तिचे मानसिक आणि शारीरिक शोषण केले. यश दयालने मुलीची त्याच्या कुटुंबियांशीही ओळख करून दिली, पण लग्नाचा विषय सातत्याने पुढे ढकलत राहिला. एका क्षणी, पीडितेला क्रिकेटपटू तिच्याशी फसवणूक करत असल्याचा संकेत मिळाला आणि तिने विरोध करायला सुरुवात केली.