मुंबई: कृष्णा नदीवरील अलमट्टी धरणाच्या जलाशय पातळीची उंची वाढविल्यास महाराष्ट्रातील सांगली, कोल्हापूर जिल्ह्यांसह, कृष्णा नदी काठच्या परिसराला पुराचा फटका बसू शकतो, असे सांगत मुख्यमंत्री देवेंद्र फडणवीस यांनी या धरणाची उंची वाढविण्याच्या कर्नाटक सरकारच्या निर्णयास विरोध केला आहे. तसेच अलमट्टीची उंची वाढवू नये, यासाठी कर्नाटक सरकारला आदेश देण्याची विनंती फडणवीस यांनी केंद्रीय जलशक्ती मंत्री सी. आर. पाटील यांना केली आहे.
अलमट्टी धरणाची उंची वाढविण्याच्या कर्नाटक सरकारच्या निर्णयास राज्य सरकारने आक्षेप घेतला आहे. मुखमंत्री फडणवीस यांनी याबाबत केंद्रीय जलशक्ती मंत्र्याना पत्र पाठवून केंद्राच्या हस्तक्षेपाची मागणी केली आहे. या पत्रात अलमट्टी धरणाचे बॅक वॉटर, नदीमधील गाळ साचणे, बंधाऱ्यांचे बांधकाम यामुळे निर्माण होणाऱ्या पूरस्थितीबाबतही फडणवीस यांनी या परिसरातील नागरिकांच्या व्यथा-वेदना मांडल्या आहेत.
राज्य सरकारने अलमट्टी धरणाच्या बॅक वॉटरमुळे निर्माण होणाऱ्या पूर परिस्थितीबाबत सिम्युलेशन आणि हायड्रानॉमिक्स पद्धतीने अभ्यास करण्याचे काम रुरकीच्या नॅशनल इन्स्टिट्यूट ऑफ हायड्रोलॉजी यांच्याकडे सोपविले आहे. या अभ्यासातून पूर परिस्थितीबाबतची साद्यंत माहिती समजून घेता येणार आहे. याबाबतचा अहवाल अजूनही प्राप्त झालेला नाही, तोवर या धरणाची उंची वाढविण्याचा निर्णय विवेकी ठरणार नाही, असेही फडणवीस यांनी स्पष्टपणे नमूद केले आहे.
कर्नाटक सरकारचा अलमट्टी जलाशयाची उंची ५१९.६ मीटरवरून ५२४.२५६ मीटर करण्याचा निर्णय राज्यासाठी अत्यंत चिंताजनक असून अशी उंची वाढविली गेल्यास सांगली, कोल्हापूर जिल्ह्यात दरवर्षीच्या पूरपरिस्थितीत आणि त्यामुळे नागरिकांच्या हाल-अपेष्टांमध्ये भर घालण्यासारखेच होईल, अशी भितीही त्यांनी व्यक्त केली आहे.
अलमट्टी धरणाच्या पाण्यामुळे कृष्णा नदी आणि तिच्या उपनद्यांच्या पात्रात गाळ साचण्याचे प्रमाण वाढले आहे. त्याचा परिणाम नद्यांच्या पाणी वाहून नेण्याच्या क्षमतेवर झाला आहे. यामुळे पुराचे पाणी ओसरण्याची गती संथ झाली आहे. याशिवाय बंधाऱ्यामध्येही मोठ्या प्रमाणात गाळ साचू लागला आहे. या सगळ्याचा एकत्रित परिणाम म्हणून महाराष्ट्रातल्या अनेक भागात पूर परिस्थिती निर्माण होऊ लागली आहे. अलमट्टी धरणाची जलाशय पातळी सहा मीटरने वाढविण्याचा कर्नाटक सरकारचा निर्णय आहे. यामुळे कृष्णा नदीतही या काळात सातत्याने सहा मीटर पाणी थांबणार आहे. यामुळे पूरस्थिती आणखी गंभीर आणि भयावह होईल. यातून सांगली, कोल्हापूर जिल्ह्यातील हजारो नागरिकांना, तसेच पिकाऊ शेत जमिनीला फटका बसणार आहे.
या सर्वांचा विचार करता, दोन्ही राज्यातील कृष्णा नदी काठच्या गावांचा आणि नागरिकांच्या हितासाठी, त्यांच्या जिविताचे, मालमत्तेचे आणि उदरनिर्वाह साधनांच्या रक्षणाचा उपाय म्हणून अलमट्टी धरणाच्या उंची वाढविण्याच्या निर्णयाचा कर्नाटक सरकारने पुनर्विचार करण्याबाबत आदेश देण्यात यावेत, अशी विनंतीही फडणवीस यांनी केंद्र सरकारला केली आहे.