Rohit Pawar Reaction On Shoes Attack On CJI B.R. Gavai: सर्वोच्च न्यायालयात काल (सोमवारी) एका वकिलाने भारताचे सरन्यायाधीश बी. आर. गवई यांच्यावर बूट फेकण्याचा प्रयत्न केला होता. सकाळच्या सुनावणीदरम्यान ही घटना घडली होती. यानंतर सुरक्षा कर्मचाऱ्यांनी तात्काळ त्या वकिलाला न्यायालयाच्या कक्षातून बाहेर काढले व नंतर दिल्ली पोलिसांच्या ताब्यात दिले. या घटनेनंतर राष्ट्रवादीचे (शरद पवार गट) आमदार रोहित पवार यांनी भाजपाला लक्ष्य केले आहे.
रोहित पवार काय म्हणाले?
सरन्यायाधीश बी. आर. गवई यांच्यावरील हल्ल्याबाबत केलेल्या एक्स पोस्टमध्ये रोहित पवार म्हणाले की, “सरन्यायाधीशांवर हल्ल्याचा प्रयत्न म्हणजे संविधान आणि लोकशाहीवर हल्ल्याचा प्रयत्न आहे. ही घटना अत्यंत निषेधार्ह आहे. थातूरमातूर गोष्टींवर क्षणार्धात पोस्ट करणाऱ्या भाजपा नेत्यांनी कालच्या घटनेवर, जेव्हा जनतेतून संतापाची भावना उमटू लागली, तेव्हा ७–८ तासांनी प्रतिक्रिया दिली. याला काय म्हणावे?”
कोण आहेत राकेश किशोर?
पोलीस अधिकाऱ्यांच्या हवाल्याने मिळालेल्या माहितीनुसार, राकेश किशोर हे सर्वोच्च न्यायालय बार असोसिएशनचे नोंदणीकृत सदस्य आहेत आणि ते दिल्लीच्या मयूर विहार परिसरात राहतात. त्यांनी २००९ मध्ये दिल्ली बार कौन्सिलमध्ये नोंदणी केली होती. ज्येष्ठ वकील असलेले राकेश किशोर हे अनेक वर्षांपासून विविध बार असोसिएशन्सचे सदस्य राहिले आहेत. पोलिसांना राकेश किशोर यांच्याकडे सर्वोच्च न्यायालय बार असोसिएशन, शाहदरा बार असोसिएशन आणि दिल्ली बार कौन्सिलचे सदस्यत्व कार्ड असल्याचे आढळले, असे वृत्त बार अँड बेंचने दिले आहे.
राकेश कुमार यांची प्रतिक्रिया
या संपूर्ण प्रकरणाबाबत बोलताना वकील राकेश किशोर म्हणाले की, “मी तुरुंगात असतो तर बरे झाले असते. माझ्या कृत्यामुळे माझे कुटुंबीय खूप नाराज आहे. ते समजू शकत नाहीत.”
खजुराहो खटल्यातील विष्णू मूर्तीचा संदर्भ देत किशोर म्हणाले की, “त्या निकालानंतर मला झोप येत नव्हती. सर्वशक्तिमान देव मला दररोज रात्री विचारत होते की, इतक्या अपमानानंतरही मी इतका शांत कसा राहू शकतो.”
त्यांनी पुढे सांगितले की, मॉरिशसमधील सरन्यायाधीश बी. आर. गवई यांच्या भाषणाबद्दल कळल्यानंतर ते आणखी संतप्त झाले होते. जिथे बी. आर. गवई म्हणाले होते की, “भारताची न्यायव्यवस्था कायद्याच्या नियमांनुसार चालते, बुलडोझरच्या नियमांनुसार नाही.”