Eknath Shinde vs Ambadas Danve over Government Schemes : लाडकी बहीण योजनेमुळे राज्य सरकारच्या तिजोरीवर ताण येत असून अनेक विभागांचा निधी महिला व बालविकास मंत्रालयाकडे वळवल्याचा दावा अनेकदा सरकारमधील मंत्र्यांनीच केला आहे. सामाजिक न्यायमंत्री संजय शिरसाट यांनी यावरून सरकारवर जाहीर नाराजी देखील व्यक्त केली होती. अशातच गोरगरिबांसाठी व शेतकऱ्यांसाठी राज्यातील महायुती सरकारने विधानसभा निवडणुकीआधी चालू केलेल्या अनेक योजना बंद असल्याची तक्रार सातत्याने ऐकायला मिळत आहे.
निधीअभावी अनेक योजना रखडलेल्या असताना विद्यमान उपमुख्यमंत्री व माजी मुख्यमंत्री एकनाथ शिंदे यांची महत्त्वकांक्षी आनंदाचा शिधा योजना बंद केल्यामुळे विरोधक सरकारला कोंडीत पकडण्याचा प्रयत्न करत आहेत. दरम्यान, शिवसेनेचे (उबाठा) नेते अंबादास दानवे यांनी अशा आठ योजनांची यादी जाहीर केली आहे ज्या एकनाथ शिंदे मुख्यमंत्री असताना सरकारने चालू केल्या होत्या. मात्र, या योजना आता बंद करण्यात आल्या आहेत असा दावा दानवे यांनी केला आहे. यासह दानवे यांनी राज्य सरकारवर टीका केली आहे. तर, एकनाथ शिंदेंना चिमटा काढला आहे.
शिंदेंनी सुरू केलेल्या आठ योजना फडणवीसांनी बंद केल्या?
दानवे यांनी एक्सवर एक पोस्ट केली आहे. या पोस्टमध्ये त्यांनी म्हटलं आहे की सामान्यांना कणभर लाभाची अपेक्षा असलेल्या योजना बंद करून देवेंद्र फडणवीस सरकारने आपल्याच सहकाऱ्यांच्या निर्णयांवर फुल्या मारल्या आहेत. अमच्यातून गेलेले ‘कटप्रमुख’ मात्र यावर शब्द न बोलता महाशक्तीच्या लाडक्या बुलेट ट्रेनची री ओढताना आपल्याला दिसतील. एकनाथ शिंदे यांच्या या योजना बंद.
१. आनंदाचा शिधा योजना – बंद!
२. माझी सुंदर शाळा योजना – बंद!
३. १ रुपयात पीकविमा योजना – बंद!
४. स्वच्छता मॉनिटर योजना – बंद!
५. १ राज्य १ गणवेश योजना – बंद!
६. लाडक्या भावाला अपरेन्टीसशिप – बंद!
७. योजनादूत योजना – बंद!
८. मुख्यमंत्री तीर्थ दर्शन योजना – बंद!
सरकारचा भंपकपणा जनतेसमोर आणू : अंबादास दानवे
दरम्यान, दानवे यांनी सरकारचा भंपकपणा जनतेसमोर मांडू असा इशारा दिला आहे. ते म्हणाले, “योजना बंद करणारे हे चालू सरकार आहे. निवडणुकांपुरत्या या सगळ्या योजनांचा भंपकपणा जनतेपुढे निश्चित मांडू.”