“नेता होण्यासाठी दुसऱ्या समाजांना शिव्या देण्याची…”, जयंत पाटलांचा पडळकरांना टोला?

जयंत पाटील म्हणाले, “अलीकडे वेगवेगळ्या समाजांचा द्वेष करण्याची फॅशन सुरू झाली आहे. आपल्या समाजात आपले नेतृत्व वाढवण्यासाठी दुसऱ्या समाजांना शिव्या देणे, इतर समाजाच्या नेत्यांना शिव्या देणे, ही पद्धत आता सुरू झाली आहे. असं वागल्यानंतर त्याच्या समाजातील लोक त्याला डोक्यावर घेतात आणि मग तो त्या समाजाचा नेता होतो. दुर्दैवाने आपल्या देशात, आपल्या महाराष्ट्रात असं पाहायला मिळतंय. दुसऱ्यांच्या समाजाला शिव्या दिल्या की आपण मोठे होऊ असं काहींना वाटतं. परंतु, असं काही होत नाही हे काहींच्या लक्षात आलेलं नाही”.

दुसऱ्यांना शिव्या देऊन आपण मोठे होऊ शकत नाही : जयंत पाटील

राष्ट्रवादी काँग्रेस पार्टी शरदचंद्र पवार पक्षाचे प्रदेशाध्यक्ष म्हणाले, “दुसऱ्याची रेष लहान करण्यापेक्षा आपली रेष कशी मोठी करता येईल याचा विचार करायला हवा. आपली रेष मोठी केली तरच आपण मोठे होऊ शकतो, हे काहींना अजून समजलेलं नाही. दुसऱ्यांना शिव्या देऊन आपण मोठे होऊ शकत नाही ही खुणगाठ सगळ्यांनी बांधून घेतली पाहिजे. परंतु, दुर्दैवाने आज आपल्या देशात, राज्यात जाती जातीत द्वेष पसरू लागला आहे. गुण्यागोविंदाने राहणारे आपण लोक हल्ली एकमेकांचा द्वेष करू लागलेलो आहोत. यशवंतराव चव्हाण यांच्या नेतृत्त्वाखाली आपण सर्वजण गुण्यागोविंदाने राहत होतो. परंतु, आता जाती जातीतला द्वेष वाढला आहे.