अलिबाग – बुधवारी घरोघरी गणेशाचे आगमन झाले होते. त्‍यानंतर आज रविवारी तीन दिवसांची पाहुणी असलेल्‍या गौराईंचे घरोघरी आगमन झाले. गौरीच्‍या आगमनामुळे खासकरून महिलावर्गात उत्‍साहाचे वातावरण आहे. महिला व बालविकास मंत्री अदिती तटकरे यांनी रायगड जिल्ह्यातील रोहा तालुक्यातील सुतारवाडी येथे पारंपारिक पद्धतीने गौराई पूजन केले.
कोकणात गणेशोत्सवाचा उत्साह टीपेला पोहोचला आहे. दुपारनंतर मुली आणि महिला गौरी आणण्‍यासाठी गेल्‍या. कोकणात तेरडयाच्‍या गौरी आणल्‍या जातात. परंपरेनुसार माळरानावरून तेरडयाच्‍या गौरींचे घरोघरी वाजतगाजत आणण्यात आल्या. त्‍यांनतर गौरी सजवण्‍यात आल्या. वस्‍त्रालंकारांचा साजश्रृंगार चढवण्‍यात आला. भेंडीच्‍या फुलांनी पूजा करण्‍यात आली. महिलांनी गौराईची सामुहिक आरती केली. आवडता भाजी भाकरीचा नैवेद्य दाखवण्‍यात आला. रात्री जेवणानंतर गौरीचे स्‍तवन झाले. महिलांची नाचगाणी फुगडया आदी खेळांना रंगत आली.
मागील चार दिवसांपासून जिल्‍हयात पावसाने ठाण मांडले होते मात्र शनिवारपासून पावसाने उघडीप घेतल्‍याने गणेशोत्‍सवासाठी गावी आलेल्‍या कोकणवासीयांमध्‍ये उत्‍साहाचे वातावरण आहे. जिल्ह्यात १५ हजार ८३२ गौराईंचे आगमन झाले. गौरींच्‍या आगमनामुळे महिलावर्गांत उत्‍साहाचे वातावरण असून या सणासाठी महिला मोठया संख्‍येने माहेरी आल्या आहेत. सोमवारी गौरीपूजन केले जाणार आहे यंदा गौरीपूजन पूर्वा नक्षत्रावर असल्‍याने नवविवाहीतांचे ओवसे होणार आहेत. मंगळवारी सायंकाळी गौरींचे विसर्जन केले जाणार आहे.