सांगली:नवरात्रनिमित्त रास दांडिया आणि मान्सूनच्या हंगामातील पारंपरिक हादगा साजरा करत असताना मिरजेतील कन्या महाविद्यालयाच्या मुलींच्या उत्साहाला शुक्रवारी उधाण आले. दांडिया खेळाचा आनंद लुटत असतानाच ऐलमा पैलमा गणेश देवा या गीतावर हादगा साजरा करत पारंपरिकेतेचे दर्शन घडवले.
मिरजमधील कन्या महाविद्यालयात नवरात्रीनिमित्त दांडिया, गरबा नृत्य आणि हादगा सोहळ्याचे आयोजन करण्यात आले होते. कार्यक्रमाचे उद्घाटन संस्थेचे सचिव राजू झाडबुके यांच्या हस्ते करण्यात आले. कार्यक्रमासाठी प्रमुख उपस्थित म्हणून कनिष्ठ महाविद्यालयाच्या उपप्राचार्या डॉ. सुनीता माळी, पर्यवेक्षिका प्रा.सौ. नलिनी प्रज्ञासूर्य उपस्थित होत्या.
महाविद्यालयात संपन्न झालेल्या कार्यक्रमात विद्यार्थ्यांनी पारंपरिक वेशभूषेत दांडियाच्या आणि गरबाच्या तालावर उत्स्फूर्त नृत्य केले. तसेच, हादगा पूजन विशेष विधीने पार पडले, ज्यामध्ये हत्तीची पूजा करण्यात आली आणि पारंपरिक हादगा गाणी गायली गेली. या पूजनातून विद्यार्थ्यांनी भक्तिभावनेत सण साजरा केला, ज्यामुळे पारंपरिक संस्कृतीचे जतन दिसून आले.
हादगा पूजेद्वारे पारंपरिक संस्कृतीची जाणीव,
भक्तिभाव आणि सामाजिक एकतेची अनुभूती विद्यार्थिनींना मिळाली. रंगीबेरंगी वेशभूषा, तालबद्ध नृत्य, हादगाच्या गाण्यांचा गजर आणि भक्तिभावपूर्ण वातावरणाने संपूर्ण महाविद्यालय उत्सवाच्या रंगात रंगलेले होते. नवरात्र उत्सवाच्या कार्यक्रमात विद्यार्थिनींनी पारंपरिक वेशभूषेत दांडियाच्या तालावर नृत्य केले. ऐलमा पैलमा गणेश देवा, माझा खेळ मांडू दे, करेन तुझी सेवा, या पारंपारिक गीतांवर मुलींनी टाळ्यांच्या तालात फेर धरला होता. कार्यक्रमाचे यशस्वी संयोजन सांस्कृतिक विभागाचे प्रा. विनायक वनमोरे, प्रा. प्रशांत लिंबीकाई, डॉ.गंगाधर चव्हाण, डॉ. मधुरा जाधव, डॉ. रूपाली वाघमारे प्रा. दीपाली आगरे, प्रा. प्रमिला जाधव, प्रा. भाग्यश्री कुंभारकर यांनी केले.सदर कार्यक्रमासाठी महाविद्यालयातील सर्व प्राध्यापक, प्राध्यापिका आणि विद्यार्थिनी मोठ्या संख्येने उपस्थित होते.