Bobby Deol Leg Twisted on Debut Movie Barsaat : बॉलीवूड अभिनेता बॉबी देओल अनेकदा त्याचा भाऊ सनी देओलची प्रशंसा करताना दिसतो. हे दोन्ही भाऊ एकमेकांवर इतके प्रेम करतात की, ते अडचणीतही एकमेकांच्या पाठीशी उभे राहतात. अलीकडेच एका मुलाखतीत बॉबी देओलने ‘बरसात’ या त्याच्या पहिल्या चित्रपटाच्या शूटिंगदरम्यान कसा अपघात झाला आणि सनी देओलने त्याच्या भावाला कसे अतिशय फिल्मी पद्धतीने वाचवले ते सांगितले.
‘रेडिओ नशा’ला दिलेल्या मुलाखतीत बॉबी देओल म्हणाला, “मला अजूनही आठवते की, इंग्लंडमध्ये शूटिंग करताना माझा पाय तुटला होता. मी घोडेस्वारी करीत असताना माझा घोडा दुसऱ्या घोड्याला धडकला. त्यामुळे मी माझा तोल गमावला आणि जमिनीवर पडलो. मला जाणवले की, माझ्या पायाला काहीतरी झाले आहे. मी उठण्याचा प्रयत्न केला; पण पुन्हा पडलो. भय्या (सनी देओल) तिथेच होता. त्यानं मला त्याच्या खांद्यावर उचललं आणि तो मला तिथून घेऊन गेला.”
बॉबी देओल म्हणाला की, सनी देओल तिथे असल्यानं त्याला असं वाटलं की, काहीही चुकीचं होऊ शकत नाही; पण कदाचित पुढे जे घडलं, त्यासाठी तो तयार नव्हता. अभिनेत्यानं सांगितलं की, सनी देओलनं त्याला जवळच्या रुग्णालयात नेलं, जिथे डॉक्टरांनी त्याचा पाय बरा होऊ शकत नाही, असं घोषित केलं. सनी देओलने त्याच रात्री त्याचा भाऊ बॉबीला एअरलिफ्ट करून लंडनला नेले. हेलिकॉप्टरने लंडनला पोहोचल्यानंतर बॉबी देओलवर शस्त्रक्रिया करण्यात आली आणि त्याचा पाय बरा झाला.
बॉबी देओल पुढे म्हणाला, “ते नेहमीच माझ्यासाठी असतात.” त्या घटनेला ३० वर्षे उलटून गेली आहेत; पण त्याच्या पायात अजूनही रॉड आणि स्क्रू आहेत, असे तो म्हणाला. बॉबी देओल म्हणाला की, यामुळे त्याला काही वेदना होतात आणि कधी कधी अस्वस्थतादेखील वाटते; परंतु कालांतरानं त्याला आता त्याची सवय झाली आहे. बॉबी देओल म्हणाला की, वेळेवर उपचार मिळाल्यानं आज तो केवळ त्याच्या पायावर उभा राहू शकत नाही, तर तो नाचू शकतो, उडी मारू शकतो, अॅक्शन सीन करू शकतो.