“हा चित्रपट करण जोहरचा…” ‘रॉकी और रानी की प्रेम कहानी’बद्दल अनुराग कश्यपची पोस्ट चर्चेत

मीडिया रीपोर्टनुसार या चित्रपटाने पहिल्याच दिवशी ११.५० कोटींची कमाई केली. ‘सॅकनिल्क’च्या अर्ली ट्रेंड रिपोर्ट्सनुसार ‘रॉकी और रानी की प्रेम कहानी’ने दुसऱ्या दिवशी जवळपास १६ कोटींची कमाई केली आहे. इतकंच नव्हे तर या चित्रपटाने दोन दिवसांत २५ कोटींचा टप्पा पार केला आहे. प्रेक्षकांबरोबरच समीक्षकांनीही या चित्रपटावर कौतुकाचा वर्षाव केला आहे. बऱ्याच बॉलिवूड कलाकारांनीही चित्रपटाचं कौतुक केलं आहे.

आणखी वाचा : दुसऱ्या दिवशी ‘रॉकी और रानी की प्रेम कहानी’च्या कमाईत वाढ; पार केला ‘इतक्या’ कोटींचा टप्पा

नुकतंच दिग्दर्शक अनुराग कश्यपने चित्रपटाचं कौतुक करणारी एक पोस्ट सोशल मीडियावर शेअर केली आहे. अनुराग कश्यप आपल्या पोस्टमध्ये म्हणाला, “हा आजवरचा करण जोहरचा सर्वात उत्तम चित्रपट आहे. मी हा चित्रपट चक्क दोनवेळा पाहिला आहे. रणवीर आणि आलिया यांची केमिस्ट्रीदेखील अप्रतिम आहे. बऱ्याच दिवसांनी हिंदी कमर्शियल चित्रपटातील लिखाण आणि संवाद मला भावले, आवडले. चित्रपटात रणवीर आणि तोता रॉय चौधरी यांना ‘डोला रे डोला’वर नाचताना बघून मी अवाकच झालो.”

पुढे अनुराग म्हणाला, “मी चित्रपट पाहताना मानमोकळेपणाने हसलो, रडलो, माझं उत्तम मनोरंजन या चित्रपटाने केलं. करणने त्याचं सर्वस्व पणाला लावून हा चित्रपट केला आहे हे यातून स्पष्ट होतं.” करण जोहरने या चित्रपटाच्या माध्यमातून सात वर्षांनी दिग्दर्शनात पुनरागमन केलं आहे. फॅमिली ड्रामा असलेल्या ‘रॉकी और रानी की प्रेम कहानी’मध्ये ‘गली बॉय’नंतर पुन्हा एकदा आलिया व रणवीर मुख्य भूमिकेत आहेत.