अभिषेक बच्चन व सैयामी खेर यांच्या प्रमुख भूमिका असलेला ‘घूमर’ चित्रपट १८ ऑगस्ट रोजी प्रदर्शित झाला. या चित्रपटाची गेले काही दिवस खूप चर्चा होती. कलाकार चित्रपटाचं जोरदार प्रमोशन करत होते. दरम्यान, शुक्रवारी प्रदर्शित झालेल्या या चित्रपटाच्या पहिल्या दिवसाच्या कमाईचे आकडे समोर आले आहेत.
बॉक्स ऑफिसवर सध्या ‘गदर २’ चा जलवा पाहायला मिळत आहे. तर ‘ओएमजी २’ चित्रपटही अजुन सिनेमागृहांमध्ये चालतोय. अशातच ‘घूमर’ प्रदर्शित झाला. ‘घूमर’ला आधीच चालणाऱ्या दोन चित्रपटांशी स्पर्धा करावी लागली. अभिषेक बच्चनच्या ‘घूमर’ या चित्रपटाला रिव्ह्यू मिळाले आहेत, पण हा चित्रपट सनी देओलच्या ‘गदर २’समोर टिकू शकला नाही. अशा परिस्थितीत चांगला कंटेंट असूनही ‘घूमर’ला चित्रपटगृहांमध्ये प्रेक्षक मिळालेले नाहीत.
‘घूमर’च्या पहिल्या दिवसाची सुरुवातीची आकडेवारी समोर आली आहे. ‘सॅकनिल्क’ने दिलेल्या सुरुवातीच्या आकडेवारीनुसार चित्रपटाने फक्त ८५ लाखांची कमाई केली. मोठी स्टारकास्ट असलेला ‘घूमर’ आर बाल्की यांनी दिग्दर्शित केला आहे. क्रिकेटवर आधारित या चित्रपटाची चांगली चर्चाही होती, मात्र पहिल्या दिवसाच्या कमाईचे आकडे पाहता चित्रपटाने फारच निराशाजनक कामगिरी केली आहे.
दरम्यान, ‘घूमर’ एका दिव्यांग महिला खेळाडूच्या प्रेरणादायी जीवनप्रवासावर बेतलेला चित्रपट आहे. या महिला क्रिकेटपटूची भूमिका अभिनेत्री सैयामी खेरने केली आहे. यामध्ये अभिषेक आणि सैयामीसह अंगद बेदी, शबाना आझमी यांच्याही महत्त्वाच्या भूमिका आहेत.