बॉलीवूड अभिनेत्री तमन्ना भाटिया अडचणीत सापडल्याचं दिसतंय. महाराष्ट्र सायबर सेलने तमन्नाला समन्स बजावलं आहे. फेअरप्ले ॲपवर आयपीएल २०२३ च्या बेकायदेशीर स्ट्रीमिंगबाबत तमन्नाला चौकशीसाठी बोलावण्यात आलंय. या स्ट्रीमिंगमुळे वायकॉमचं कोट्यवधी रुपयांचं नुकसान झालंय. तिला २९ एप्रिल रोजी महाराष्ट्र सायबर सेलसमोर हजर राहण्यास सांगण्यात आलं आहे.
तमन्ना भाटियाने फेअरप्लेचं प्रमोशन केलं होतं, त्यामुळे तिची या प्रकरणी चौकशी केली जाईल. तिला साक्षीदार म्हणून चौकशीसाठी बोलावण्यात येत आहे. फेअरप्लेच्या प्रमोशनसाठी तिच्याशी कोणी संपर्क साधला होता आणि त्यासाठी तिला किती पैसे मिळाले, यासंदर्भात तिची चौकशी केली जाणार आहे. ‘एएनआय’ने याबद्दल वृत्त दिलं आहे.
तमन्ना भाटियाआधी २३ एप्रिल रोजी अभिनेता संजय दत्तलाही या प्रकरणी समन्स बजावण्यात आलं आहे. पण, संजय सध्या मुंबईत नाही, त्यामुळे दिलेल्या तारखेला हजर राहू शकत नसल्याचं त्याने म्हटलं आहे. त्याने आपला जबाब नोंदवण्यासाठी तारीख आणि वेळ मागितली आहे.
मीडिया रिपोर्ट्सनुसार, वायकॉमने महाराष्ट्र सायबर सेलमध्ये तक्रार दाखल केली आहे. या प्रकरणी तपास केला जात असून त्याचसंदर्भात तमन्ना भाटिया आणि संजय दत्त यांना चौकशीसाठी समन्स पाठवण्यात आले आहे. या प्रकरणी रॅपर बादशाहचा जबाबही नोंदवण्यात आला आहे. फेअरप्लेवर बेकायदेशीरपणे आयपीएलचं स्ट्रीमिंग केल्याने वायकॉमचं मोठं नुकसान झाल्याचं म्हटलं जातंय.