Mission Raniganj Box Office Collection Day 2: अक्षय कुमारची मुख्य भूमिका असलेला ‘मिशन रानीगंज’ हा चित्रपट शुक्रवारी सिनेमागृहांमध्ये प्रदर्शित झाला. या बायोपिकची घोषणेपासूनच जोरदार चर्चा होती. पश्चिम बंगालमधील रानीगंज येथे खाणीत अडकलेल्या ६५ कामगारांना वाचवण्यासाठी सरदार जसवंत सिंग गिल यांनी व इतरांनी केलेल्या मदतीवर आधारित हा चित्रपट आहे. सत्य घटनेवर आधारित या चित्रपटात स्टारकास्टही मोठी आहे. तसेच अनेक थरारक दृश्ये आहेत.
चित्रपटाचे बजेट ५५ कोटी आहे. या चित्रपटाने बॉक्स ऑफिसवर पहिल्या दिवशी सरासरी ओपनिंग केली. ‘सॅकनिल्क’च्या रिपोर्टनुसार, ‘मिशन रानीगंज’ने पहिल्या दिवशी २.८ कोटी कमावले. चित्रपटाला वीकेंडचा फायदा झाल्यास या दोन दिवसात आणखी चांगला गल्ला जमवता येऊ शकतो असा अंदाज बांधला जात होता. परंतु त्यापेक्षा जास्तच कमाई या चित्रपटाने दुसऱ्या दिवशी केली आहे.
दुसऱ्या दिवशी ‘मिशन राणीगंज’च्या कमाईत ६९% वाढ दिसून आली. दुसऱ्या दिवशी या चित्रपटाने बॉक्स ऑफिसवर जवळपास ४.७० कोटींची कमाई केली. दोन दिवसांत मिळून या चित्रपटाने आत्तापर्यंत ७.५ कोटींपेक्षा जास्त कमाई केली आहे. बॉक्स ऑफिसवर अजूनही ‘जवान’ प्रेक्षकांना आकर्षित करत असतानाही अक्षय कुमारच्या या चित्रपटाला प्रेक्षकांनी चांगला प्रतिसाद दिला आहे.
गेल्या काही वर्षातील अक्षय कुमारच्या इतर चित्रपटांपेक्षा ‘मिशन राणीगंज’ने ठीकठाक कमाई केली आहे. नुकताच प्रदर्शित झालेल्या ‘ओह माय गॉड २’ या चित्रपटाने १५० कोटींची कमाई केली होती. त्यामानाने ‘मिशन राणीगंज’च्या कमाईचे आकडे कमीच आहेत. या चित्रपटात अक्षय कुमारच्या पत्नीची भूमिका परिणीती चोप्राने केली आहे. यामध्ये कुमुद मिश्रा, रवी किशन, पवन मल्होत्रा, लंकेश भारद्वाज, राजेश शर्मा यांच्याही भूमिका आहेत.