सैफ अली खानच्या उपचारांसाठी किती खर्च झाला? मेडिक्लेमचा आकडा आला समोर, डिस्चार्जची तारीखही झाली उघड

सैफच्या आरोग्य विम्याची कागदपत्रे सोशल मीडियावर व्हायरल झाली आहेत. सैफकडून ३५ लाख ९८ हजार रुपयांचा आरोग्य विमा दाखल करण्यात आला होता. यापैकी कंपनीने २५ लाख मंजूर केले आहेत. याबद्दल निवा हेल्थ इन्शुरन्सने, संपूर्ण उपचारानंतर अंतिम बिल सादर झाल्यानंतर उर्वरित रक्कम दिली जाईल असं म्हटलं असल्याचं वृत्त इंडिया टुडेने दिलं आहे.

सैफला डिस्चार्ज केव्हा मिळणार?

सैफच्या आरोग्य विम्याच्या कागदपत्रांमध्ये त्याचा उपचार खर्च आणि त्याच्या संभाव्य डिस्चार्ज तारखेची माहिती उघड करण्यात आली आहे. अभिनेत्यावर लीलावती रुग्णालयात एका सूटमध्ये उपचार सुरू आहेत आणि २१ जानेवारी २०२५ रोजी त्याला डिस्चार्ज मिळण्याची अपेक्षा आहे. असं या कागदपत्रांमध्ये नमूद करण्यात आलं आहे.

इंडिया टुडेला सूत्रांनी दिलेल्या माहितीनुसार, जर सैफची प्रकृती उत्तम असेल तर त्याला कदाचित २० जानेवारी सुद्धा डिस्चार्ज मिळू शकतो. दरम्यान, सैफच्या कुटुंबीयांनी या प्रकरणाची सध्या तपासणी सुरू असताना वैद्यकीय पथकाला कोणतेही अधिक अपडेट्स शेअर न करण्याची विनंती केली आहे.

निवा बुपा यांनी एका निवेदनात म्हटले आहे की, “अभिनेता सैफ अली खानबरोबर घडलेली घटना अतिशय दुर्दैवी आणि अत्यंत चिंताजनक आहे. आम्ही त्याची प्रकृती लवकर ठीक व्हावी यासाठी शुभेच्छा देत आहोत. रुग्णालयात दाखल झाल्यानंतर आम्हाला कॅशलेस प्री-ऑथोरायझेशनची विनंती पाठवण्यात आली होती आणि उपचार सुरू करण्यासाठी आम्ही सुरुवातीच्या रकमेची मंजुरी दिली आहे. पूर्ण उपचारानंतर अंतिम बिल मिळाल्यानंतर, पॉलिसीच्या अटी आणि शर्तींनुसार उर्वरित रक्कम दिली जाईल.”

दरम्यान, सैफ अली खानच्या आरोपीला तीन दिवसांनी ठाण्यातून ताब्यात घेण्यात आलं आहे. आरोपीला न्यायलयात हजर करून त्याच्या पोलीस कोठडीची मागणी केली जाईल असं पोलिसांनी पत्रकार परिषद घेत सांगितलं आहे.