अनेकांचं बॉलीवूडमध्ये करिअर करायचं स्वप्न असतं. चित्रपटात मुख्य भूमिका करायची, यश मिळवायचं यासाठी अनेक कलाकार मेहनत घेतात. काहींना संधीच मिळत नाही, तर काहींना संधी मिळून ते अपयशी ठरतात. अशीच एक अभिनेत्री म्हणजे उर्वशी रौतेला होय. तिला बॉलीवूडमध्ये १० वर्षे झाली आहेत, पण आजवर तिचा एकही चित्रपट हिट झालेला नाही. तरीही ती भारतातील सर्वाधिक मानधन घेणाऱ्या अभिनेत्रींपैकी एक आहे.
बॉलीवूड अभिनेत्री उर्वशी रौतेलाने अभिनयात येण्यापूर्वी अनेक सौंदर्य स्पर्धा जिंकल्या आहेत आणि मॉडेलिंगच्या आधारे केवळ देशातच नाही तर परदेशातही नाव कमावलं. परंतु बॉलीवूडमधील तिचं करिअर फार खास राहिलं नाही. आता ती चित्रपटांमध्ये फक्त आयटम नंबर करताना दिसत आहे. मात्र, याचा तिच्या लोकप्रियतेवर कोणताही परिणाम झालेला नाही. उर्वशी एका डान्ससाठी मानधन म्हणून कोट्यवधी रुपये घेते. तिने पहिल्या चित्रपटात तिच्यापेक्षा ३८ वर्षांनी मोठ्या अभिनेत्यासह रोमान्स केला होता, पण हा चित्रपट बॉक्स ऑफिसवर फ्लॉप ठरला. यासंदर्भात ‘डीएनए’ ने वृत्त दिलं आहे.
एकदा अशी बातमी आली होती की उर्वशी रौतेलाने दक्षिण भारतीय मेगास्टार चिरंजीवी अभिनीत ‘वॉल्टेअर वीरैया’ मधील आयटम नंबरसाठी २ कोटी रुपये घेतले होते. ‘सियासत’ च्या वृत्तानुसार तिने ‘बोयापती श्रीनू’ या राम पोथीनेनीच्या आगामी चित्रपटातील तीन मिनिटांच्या सीनसाठी३ कोटी रुपयांची मागणी केली आहे. याचा अर्थ तिला प्रत्येत मिनिटासाठी १ कोटी रुपये दिले जातील, ज्यामुळे ती भारतातील सर्वाधिक कमाई करणारी अभिनेत्री बनेल.
उर्वशीने २०१३ मध्ये ‘सिंह साब द ग्रेट’ या चित्रपटातून पदार्पण केलं. यात तिने सनी देओलसोबत काम केलं होतं. त्यावेळी ती फक्त १९ वर्षांची होती आणि तिने त्यावेळी ५७ वर्षांचा असलेल्या सनी देओलसोबत रोमँटिक सीन दिले होते. पण हा चित्रपट बॉक्स ऑफिसवर चांगलाच फ्लॉप ठरला होता. बॉक्स ऑफिस इंडियानुसार, चित्रपटाचे बजेट ४२ कोटी रुपये होते आणि त्याने फक्त ३२ कोटींची कमाई केली होती.
यानंतर उर्वशीच्या करिअरला जणू उतरती कळा लागली. खरं तर तिने अनेक चित्रपटांमध्ये काम केलं, पण एकही चित्रपट बॉक्स ऑफिसवर यशस्वी होऊ शकला नाही. पहिल्या सिनेमानंतर तीन वर्षांनी तिने ‘सनम रे’ चित्रपटात काम केले, यात ती जोडी पुलकित सम्राटसोबत होती. यामी गौतम देखील यात होती. पण यात उर्वशीचा कॅमिओ होता, पण हा चित्रपटही फ्लॉप झाला. मग तिने २०१८ मध्ये ‘हेट स्टोरी ४’ आणि २०१९ मध्ये ‘पागलपंती’ मध्ये काम केलं होतं. पण हे चित्रपटही यशस्वी ठरले नाही. उर्वशीने बॉलीवूडमध्ये १० वर्षे पूर्ण केली आहेत, परंतु तिचा एकही चित्रपट हिट झाला नाही. येत्या काळात ती ‘दिल है ग्रे’ आणि ‘ब्लॅक रोज’मध्ये दिसणार आहे.
अभिनयाव्यतिरिक्त उर्वशी रौतेला क्रिकेटपटू रिषभ पंतबरोबरच्या कथित नात्यामुळे खूप चर्चेत होती. त्यांची भांडणं सोशल मीडियावरही पाहायला मिळाली होती. रिषभला आपण आवडत असल्याचा दावा उर्वशीने केला होता. पण रिषभने लोक खोटं बोलत असल्याची पोस्ट नाव न घेता केली होती.