Fatima Shaikh Harassment : बॉलीवूड अभिनेत्री फातिमा सना शेख सध्या तिच्या नुकत्याच प्रदर्शित झालेल्या ‘मेट्रो इन दिनों’ या चित्रपटामुळे चर्चेत आहे. दरम्यान, अभिनेत्रीने तिच्याबरोबर घडलेल्या एका अतिशय भयानक घटनेचा खुलासा केला आहे.
फातिमा सना शेखने सांगितले की, एका व्यक्तीने तिला सार्वजनिक ठिकाणी चुकीच्या पद्धतीने स्पर्श केला, त्यानंतर अभिनेत्रीने त्याला मारले होते; परंतु त्या व्यक्तीनेही फातिमाला खूप जोरात मारले होते.
हॉटरफ्लायला दिलेल्या मुलाखतीत, फातिमाने त्या घटनेची आठवण करून दिली, ज्यामुळे आजपर्यंत अशा परिस्थितींना सामोरे जाण्याची तिची पद्धत बदलली आहे. फातिमा म्हणाली, “एकदा एका माणसाने मला चुकीच्या पद्धतीने स्पर्श केला, म्हणून मी त्याला मारले. पण, नंतर त्याने मला इतके जोरात मारले की मी जमिनीवर पडले.”
फातिमा सना शेख पुढे म्हणाली, “त्याने मला चुकीच्या पद्धतीने स्पर्श केला म्हणून मी त्याला मारहाण केली, पण तो इतका रागावला की त्याने मला इतके जोरात मारले की मी खाली पडले. त्या घटनेनंतर मी थोडी सावध झाले. मला समजले की अशा परिस्थितीत आपण कशी प्रतिक्रिया द्यायची याचा विचार केला पाहिजे. तुम्ही विचार करा, आपल्याबरोबर काहीतरी चुकीचे होत आहे आणि आपण त्यावर कशी प्रतिक्रिया द्यायची याचा विचार केला पाहिजे.’
टेम्पोचालकाने केले होते घाणेरडे कृत्य
फातिमाने अलीकडेच मुंबईत घडलेल्या एका घटनेची आठवण सांगितली. फातिमाने मुंबईत कोविड लॉकडाऊनदरम्यान तिच्याबरोबर घडलेल्या आणखी एका घटनेबद्दल सांगितले. तिने सांगितले, “लॉकडाऊनदरम्यान मी मुंबईत मास्क घालून सायकल चालवत होते, तेव्हा एक टेम्पोचालक सतत हॉर्न वाजवत होता आणि विचित्र आवाज करत होता. मी माझ्या घराच्या रस्त्यावर येईपर्यंत तो माझा पाठलाग करत होता.”
अनुराग बासू दिग्दर्शित ‘मेट्रो इन दिनों’ चित्रपटात फातिमा सना शेख अलीकडेच दिसली होती. यात अली फजल, पंकज त्रिपाठी, कोंकणा सेन शर्मा, नीना गुप्ता, अनुपम खेर आणि आदित्य रॉय कपूरसारखे कलाकार महत्त्वाच्या भूमिकांमध्ये आहेत. या चित्रपटाला प्रेक्षक आणि समीक्षकांकडून चांगला प्रतिसाद मिळाला आहे. याशिवाय, फातिमाचा ‘आप जैसा कोई’ हा चित्रपट या शुक्रवारी (२६ जून) नेटफ्लिक्सवर प्रदर्शित झाला आहे. आर. माधवनदेखील त्यात मुख्य भूमिकेत आहे.