हॉलीवूड मधील अतिशय लोकप्रिय चित्रपटांपैकी एक म्हणजे ‘फास्ट अ‍ॅण्ड फ्युरियस’. हा चित्रपट भारतात सर्वाधिक पाहिला जाणार हॉलीवूड चित्रपट आहे. याचे एकूण आठ भाग रिलीज झाले असून नववा भाग लवकरच प्रेक्षकांच्या भेटीस येत आहे. हा चित्रपट अमेरिका आणि कॅनडामध्ये येत्या गुरुवारी प्रदर्शित होणार आहे.
‘फास्ट अ‍ॅण्ड फ्युरियस’ च्या नवव्या सिक्वलचा ट्रेलर २०१९ मध्येच रिलीज झाला होता आणि १८ डिसेंबर २०१९ रोजी हा चित्रपट प्रदर्शित होणार होता. मात्र करोना माहामारीच्या संकटामुळे ‘फास्ट अ‍ॅण्ड फ्युरियस-९’ ची रिलीज डेट पुढे ढकलण्यात आली होती. हा सिनेमा इंग्रजीबरोबरच हिंदी, तामिळ आणि तेलगू या भाषांमध्ये देखील प्रदर्शित होणार असून आता निर्मात्यांनी *या सिनेमाच्या प्रदर्शनाची अधिकृत तारीख जाहीर केली आहे.
‘फास्ट अ‍ॅण्ड फ्युरियस’ हा एक अ‍ॅक्शनपट सिनेमांची मालिका आहे. या चित्रपटातील कलाकार वेगवान गाड्यांचा वापर करुन कोट्यवधींच्या चोऱ्या करतात. यावेळी पोलीस आणि चोरांमध्ये रंगलेला लपंडाव या चित्रपटांमध्ये दाखवला जातो. जबरदस्त अ‍ॅक्शन सीन्स, फाईट आणि वेगवान गाड्यांच्या स्टंटबाजीमुळे ‘फास्ट अ‍ॅण्ड फ्युरियस’ ही चित्रपट मालिका भारतात प्रचंड लोकप्रिय आहे. या मालिकेचा नववा भाग ‘५ ऑगस्ट’ रोजी प्रेक्षकांच्या भेटीला सज्ज झाला आहे.
दरम्यान ‘फास्ट अ‍ॅण्ड फ्युरियस’मध्ये आपण आतापर्यंत ड्वेन जॉन्सन, पॉल वॉकर, जेसन स्टॅथम यांसारख्या अनेक कलाकारांना स्टंटबाजी करताना पाहिले आहे. यावेळी अ‍ॅक्शनस्टार विन डिझलबरोबर मिशेल रोड्रिग्ज WWE सुपरस्टार जॉन सिना देखील अ‍ॅक्शन करताना दिसणार आहे. या चित्रपटाचा ट्रेलर सोशल मीडियावर रिलीज झाल्यापासून अक्षरश: धुमाकूळ घालत आहे. तर आता प्रेक्षक ५ ऑगस्टची आतूरतेने वाट पाहत आहेत.