Dashavatar Box Office Collection Day 3 : ‘दशावतार’ या मराठी चित्रपटाची सध्या खूपच चर्चा आहे. त्याचं कारण म्हणजे ज्येष्ठ अभिनेते दिलीप प्रभावळकर यांची मुख्य भूमिका असलेला हा चित्रपट बॉक्स ऑफिसवर चांगली कमाई करत आहे. ‘दशावतार’ शुक्रवारी (१२ सप्टेंबर रोजी) प्रदर्शित झाला. या चित्रपटाने तीन दिवसांत बॉक्स ऑफिसवर किती कमाई केली? ते पाहुयात.
कोकणात घडणाऱ्या गूढ कथेवर आधारित ‘दशावतार’ चित्रपटाची बांधणी करण्यात आली आहे. कोकणातील नयनरम्य ठिकाणी सलग ५० दिवसांत चित्रपटाचे चित्रीकरण करण्यात आले असल्यामुळे कोकणच्या भव्यतेचा अनुभव रसिकप्रेक्षकांना रुपेरी पडद्यावर पाहायला मिळतोय.
कोकणातील इरसाल माणसांचे नमुने, तिथल्या प्रथा परंपरा, दशावतारी नाट्यकला यांचा सुरेख मिलाफ दशावतारमध्ये पाहायला मिळतोय. दिलीप प्रभावळकर हे कलासक्त वृद्ध दशावतारी बाबुली मेस्त्री नावाचे पात्र साकारत आहेत. त्यांच्या आयुष्यातल्या वादळांची गोष्ट ‘दशावतार’ सिनेमात दाखवण्यात आली आहे. या चित्रपटाला प्रेक्षकांची खूप पसंती मिळतेय. तीन दिवसांत या चित्रपटाने ४ कोटींहून जास्त कमाई केली आहे.
‘दशावतार’चे बॉक्स ऑफिस कलेक्शन
‘दशावतार’चा बॉक्स ऑफिसवर जलवा आहे. कारण रविवारी या चित्रपटाच्या कमाईत मोठी वाढ झाली आहे. पहिल्या दिवशी ‘दशावतार’ने ५८ लाख रुपयांची कमाई केली होती, दुसऱ्या दिवशी म्हणजेच शनिवारी चित्रपटाच्या कमाईत वाढ झाली. ‘दशावतार’ने १ कोटी ३९ लाख रुपयांचा गल्ला जमवला. तिसऱ्या दिवशी मात्र ‘दशावतार’ने पहिल्या दोन दिवसांच्या कमाईपेक्षाही जास्त कलेक्शन केले.
इंडस्ट्री ट्रॅकर सॅकनिल्कने दिलेल्या आकडेवारीनुसार, ‘दशावतार’ने तिसऱ्या दिवशी म्हणजेच रविवारी २.४ कोटी रुपयांचे कलेक्शन केले आहे. ‘दशावतार’ची तीन दिवसांची एकूण कमाई ४.३७ कोटी रुपये झाली आहे. चित्रपटाला मुंबई, पुणेसह नागपूर, छत्रपती संभाजीनगर, सांगली व नाशिक शहरात प्रेक्षकांचा चांगला प्रतिसाद मिळतोय.
‘दशावतार’ सिनेमातील कलाकार
‘दशावतार’ या चित्रपटात दिलीप प्रभावळकर, महेश मांजरेकर, भरत जाधव, सिद्धार्थ मेनन, अभिनय बेर्डे, प्रियदर्शिनी इंदलकर अशी मराठी चित्रपटातील दिग्गज कलाकारांची फौज आहे. तसेच विजय केंकरे, सुनील तावडे, रवी काळे, लोकेश मित्तल, आरती वडगबाळकर यांच्याही महत्त्वाच्या भूमिका आहेत.