‘स्टार प्रवाह’ वाहिनीवर लवकरच दोन नव्या मालिका सुरू होत आहेत. ‘घराघरो मातीच्या चुली’ आणि ‘साधी माणसं’ या दोन नव्या मालिका १८ मार्चपासून प्रेक्षकांच्या भेटीस येत आहेत. त्यामुळे प्रेक्षकही नव्या मालिकांविषयी उत्सुक आहेत. अशातच ‘स्टार प्रवाह’वर नवा रिअ‍ॅलिटी शो देखील प्रेक्षकांच्या भेटीला येणार आहे. याचा पहिला-वहिला प्रोमो नुकताच समोर आला आहे.
‘स्टार प्रवाह’वर सध्या अभिनेता सिद्धार्थ जाधव सूत्रसंचालन करत असलेला ‘आता होऊ दे धिंगाणा २’ रिअ‍ॅलिटी शो सुरू आहे. या शोमध्ये दोन मालिकांच्या टीममधली सांगीतिक लढत पाहायला मिळत आहे. पण लवकरच सिद्धार्थचा धिंगाणा प्रेक्षकांचा निरोप घेणार आहे. ‘आता होऊ दे धिंगाणा २’ ची जागा ‘मी होणार सुपरस्टार – जोडी नंबर १’ हा नवा रिअ‍ॅलिटी शो येणार आहे.
‘मी होणार सुपरस्टार – जोडी नंबर १’ या नव्या रिअ‍ॅलिटी शोमधून चमचमीत आणि झणझणीत डान्सच्या जोड्या घेऊन अभिनेता अंकुश चौधरी प्रेक्षकांच्या भेटीस घेऊन येणार आहे. याआधी ‘मी होणार सुपरस्टार – जल्लोष ज्युनियर्सचा’ हा शो चांगलाच गाजला होता. त्यामुळे आता ९ मार्चपासून दर शनिवार-रविवारी रात्री ९ वाजता ‘मी होणार सुपरस्टार – जोडी नंबर १’ हा शो सुरू होतं आहे. याचा पहिला-वहिला प्रोमो ‘मराठी टीव्ही इन्फो ऑफिशिअल’ या पेजवर शेअर करण्यात आला आहे.
दरम्यान, ‘मी होणार सुपरस्टार – जोडी नंबर १’ या नव्याकोऱ्या डान्स रिअ‍ॅलिटी शोमधून जुळे भाऊ, बाप-लेक, बहिणी-बहिणी अशा जोड्यांचा धमाकेदार डान्स पाहायला मिळणार आहे. या शोमध्ये आता अंकुश चौधरीसह परीक्षकाच्या भूमिकेत कोण-कोण असणार? हे येत्या काळातच स्पष्ट होईल.