Priya Marathe Passes Away : प्रिया मराठेच्या अकाली निधनाने संपूर्ण मराठी कलाविश्वावर शोककळा पसरली आहे. प्रियाने ‘पवित्र रिश्ता’ या गाजलेल्या मालिकेत वर्षा ही भूमिका साकारली होती. याच मालिकेत तिच्यासह लोकप्रिय अभिनेत्री प्रार्थना बेहेरे सुद्धा झळकली होती. या दोघीजणी मालिकेत एकमेकींच्या ऑनस्क्रीन बहिणी होत्या.
प्रिया मराठे ही प्रार्थनाची इंडस्ट्रीमधली पहिली मैत्रीण होती आणि ही मैत्री प्रियाने शेवटच्या क्षणापर्यंत निभावली. जिवलग मैत्रिणीला अखेरचा निरोप देताना प्रार्थनाला अश्रू अनावर झाले होते. आज प्रियाच्या आठवणीत भावनिक पोस्ट शेअर करत प्रार्थनाने दु:ख व्यक्त केलं आहे.
प्रार्थना बेहेरेची भावनिक पोस्ट
ए वेडे
प्रिया, पियू, परी, प्री
ती माझ्यासाठी फक्त एक सहकलाकार नव्हती, ती माझी अतिशय जवळची, माझ्या जिव्हाळ्याची मैत्रीण होती. माझी वेडे…
आम्ही एकत्र घर शेअर केलं होतं. कितीतरी वेळा आम्ही तासन्‌तास बोलत बसायचो…मॅगी, भुर्जी, कॉफी… हे सगळं आमचं छोटंसं जग होतं.
खूप साऱ्या गप्पा, काहीसं वेडं हसणं, रात्री उशिरापर्यंत जागं राहणं – त्या क्षणांना काही तोड नाही.ती माझी इंडस्ट्रीतील पहिली मैत्रीण होती – आणि खरी सख्खी मैत्रीण.
तिच्यामुळेच हे नवीन जग मला आपलंसं वाटलं. तिच्याबरोबर मी स्वतःला शोधलं, हसावं, रडावं आणि मोकळं व्हावं असं वाटलं.अभिनयाच्या सुरुवातीच्या दिवसांत जेव्हा सर्व काही नवीन, अनोळखी आणि वाटायचं, तेव्हा तिचं हसतंमुख, तिचं प्रेमळ बळ माझ्याबरोबर कायम होतं. तिच्यासोबत मी पहिला सीन केला, पहिल्यांदा Camera शेअर केला. ती इतकी हसमुख, प्रामाणिक, भावनाशील आणि जिव्हाळ्याने भरलेली व्यक्ती होती की तिच्याबरोबर क्षणभरही घालवला, तरी तो कायमचा लक्षात राहिला.
कॅन्सरशी लढा देत असताना, एक वेळ अशी आली होती की तिची तब्येत थोडीशी सुधारली. तेव्हा ती माझ्या अलिबागच्या घरी आली होती.
मी, ती आणि शाल्मली- आम्ही तिघींनी एकत्र इतका सुंदर वेळ घालवला की तो क्षण कायमचा मनात कोरला गेला आहे.
ती खूप आनंदी होती…तेव्हा तिने मला एका शांत स्वरात म्हटलं,
“तुझं घर, तुझं वातावरण, तुझे हे कुत्रे… हे सगळं मला बरं करतंय. मला इथे येऊन बरं वाटतंय… जणू काही हे ठिकाणच मला heal करतंय.”कॅन्सरने तिचं शरीर झिजवलं, पण तिचं मन, तिचा आत्मा, तिच्यातील खंबीरपणा – ते कोणताही आजार हरवू शकला नाही. शेवटच्या क्षणापर्यंत तिने जगायला आणि हसवायला शिकवलं.
ती गेली, पण तिच्या आठवणी, तिचं हास्य, तिचं अभिनयातलं तेज- सगळं अजूनही माझ्याबरोबर आहे.
माझ्या आयुष्याचा एक भाग तिच्याबरोबर गेला, आणि तो भाग मी जपून ठेवणार आहे…. कायमचा.
दरम्यान, गेली दोन वर्षे प्रिया कर्करोगाशी झुंज देत होती. गेल्यावर्षी तिची प्रकृती काही प्रमाणात सुधारली होती मात्र, त्यानंतर पुन्हा एकदा तिचा आजार बळावला. अवघ्या ३८ व्या वर्षी ३१ ऑगस्टला सकाळी मीरारोड येथील राहत्या घरी प्रियाने अखेरचा श्वास घेतला.