काही महिन्यांपूर्वी सुरू झालेली ‘प्रेमाची गोष्ट’ ही मालिका सध्या लोकप्रियतेच्या शिखरावर आहे. अल्पावधीतच या मालिकेने प्रेक्षकांच्या मनात अटळ स्थान निर्माण केलं आहे. त्यामुळे मालिकेतील पात्र घराघरात पोहोचले आहे. मुक्ता, सागर, सई, सावनी यांच्या व्यक्तिरिक्त इतर पात्रांनी देखील प्रेक्षकांची मन जिंकली आहेत. सध्या मालिकेतील एका अभिनेत्रीच्या सोशल मीडियावरील पोस्टने सगळ्यांचं लक्ष वेधून घेतलं आहे. अभिनेत्रीने या पोस्टद्वारे बॉयफ्रेंडला वाढदिवसाच्या शुभेच्छा दिल्या आहेत.
‘प्रेमाची गोष्ट’ मालिकेतील मिहिका म्हणजे अभिनेत्री मृणाली शिर्केने तीन दिवसांपूर्वी बॉयफ्रेंडच्या वाढदिवसाच्या निमित्ताने खास पोस्ट केली होती. ज्यामध्ये तिने एक व्हिडीओ शेअर करत लिहिल होतं, “माझ्या आनंदाचे व माझ्या शांत स्वभावाचे एका शब्दा वर्णन करायचे असल्यास, तर हे कार्टून आहे. माझ्या प्रेमा, तुला वाढदिवसाच्या खूप खूप शुभेच्छा. तुझ्या वागण्याने तू नेहमी मला आनंदी ठेवतोस आणि याचा मला अभिमान वाटतो. तू माझा खरंच खूप चांगला मित्र आहेस, रोहन. तुझा वाढदिवस असेल पण तू माझ्यासाठी एक खास भेट आहेस. यासाठी मी स्वतःला भाग्यवान समजते.” मृणालीची ही पोस्ट चांगलीच चर्चेत आली आहे.
हेही वाचा – सोशल मीडियावर पहिली ओळख अन्…; ‘अशी’ आहे प्रथमेश परब-क्षितिजाची अनोखी लव्हस्टोरी
हेही वाचा – Premachi Goshta: बाथरुमवरून भांडण ते नाश्त्याला ऑम्लेट पाव..; ‘असा’ असणार मुक्ताचा सासरचा पहिला दिवस
मृणालीच्या या पोस्टवर बॉयफ्रेंड रोहन कमेंट करत म्हणाला, “धन्यवाद माझ्या प्रेमा. हे खूपच गोड आहे (लाजिरवाणे). मी तुझ्यावर खूप प्रेम करतो. सगळ्या गोष्टीसाठी खूप धन्यवाद.” बॉयफ्रेंडच्या या कमेंटवर मृणाली म्हणाली, “वाह…लाजिरवाणे…ठीक आहे बेटा…हा तुझा दिवस आहे…मी आज काहीच बोलणार नाही.”
दरम्यान, मृणालीच्या आणि तिच्या बॉयफ्रेंडच्या सोशल मीडियावर अकाउंटवर दोघांचे अनेक फोटो, व्हिडीओ आहेत. बऱ्याच वर्षांपासून दोघं एकमेकांना डेट करत आहेत. मृणालीच्या कामाबद्दल बोलायचं झालं तर, तिने ‘प्रेमाची गोष्ट’ या मालिकेपूर्वी बऱ्याच मालिकांमध्ये काम केलं आहे. ‘मेरे साई’, ‘जय जय स्वामी समर्थ’, ‘बाळूमामाच्या नावानं चांगभलं’ या मालिकांमध्ये मृणालीने काम केलं आहे. तसंच ती ‘हरिओम’ या चित्रपटात झळकली होती.