मुंबई : कफ परेड – वांद्रे – सीप्झ – आरे भुयारी मेट्रो ३ मार्गिका पूर्ण क्षमतेने धावू लागल्यापासून या मार्गिकेला प्रवाशांचा चांगला प्रतिसाद मिळू लागला आहे. ऑक्टोबर महिन्यात या मार्गिकेवरून ३८ लाख ६३ हजार ७४१ प्रवाशांनी प्रवास केला. या मार्गिकेवरून प्रतिदिन सरासरी १ लाख ४१ हजार प्रवासी प्रवास करीत आहेत.
मुंबईतील पहिली भुयारी आणि सर्वात लांब भुयारी मेट्रो मार्गिका आरे – कफ परेड दरम्यान धावते. ऑक्टोबर २०२४ मध्ये पहिला टप्पा वाहतूक सेवेत दाखल झाला, तेव्हा या दैनंदिन प्रवासी संख्या १९ हजार होती. दुसरा टप्पा मे २०२५ मध्ये सुरू झाल्यानंतर ही संख्या ७० हजारांच्या घरात गेली. शेवटचा टप्पा ९ ऑक्टोबरपासून वाहतूक सेवेत दाखल झाल्यापासून दैनंदिन प्रवासी संख्या दीड लाखाच्या आसपास गेली आहे.
या या मार्गिकेवरील अपेक्षित प्रवासी संख्या प्रतिदिन १३ लाख अशी आहे. मार्गिकेला प्रवाशांचा मिळणारा प्रतिसाद पाहता भविष्यात मुंबईकर मोठ्या संख्येने या मार्गिकेचा वापर करतील, असा विश्वास मुंबई मेट्रो रेल काॅर्पोरेशनला (एमएमआरसी) आहे.
चौकट : ऑक्टोबर महिन्यात या मार्गिकेवरून ३८ लाख ६३ हजार ७४१ प्रवाशांनी प्रवास केला आहे. ९ ऑक्टोबरला शेवटचा टप्पा सेवेत दाखल झाल्यावर ३३ लाख ३३ हजार ६८४ प्रवाशांनी प्रवास केला. सोमवार – शुक्रवारदरम्यान या मार्गिकेवरील दैनंदिन प्रवासी संख्या १ लाख ४१ हजार ०२४ अशी आहे. तर ऑक्टोबरमध्ये एका दिवसातील विक्रमी दैनंदिन प्रवासी संख्या १ लाख ८२ हजार ४६१ अशी होती.