मुंबई : Mumbai Weather Forecast गेले अनेक दिवस विश्रांती घेतलेल्या पावसाने गुरुवारी सकाळपासूनच मुंबई शहर तसेच उपनगरांत पुन्हा दमदार हजेरी लावली. मुंबई सकाळपासून संततधार पाऊस पडत आहे. दरम्यान, हवामान विभागाने मुंबई, ठाणे, तसेच पालघरमध्ये गुरुवारी व शुक्रवारी मुसळधार पावसाचा इशारा दिला आहे. यामुळे या भागात पुढील काही तास पावसाचा जोर कायम राहण्याची शक्यता आहे. तसेच शुक्रवारी ढगांच्या गडगडाटासह पाऊस पडण्याची शक्यता हवामान खात्याने वर्तविली आहे.
हेही वाचा >>> Weather Update: पश्चिम बंगालच्या उपसागरात कमी दाबाचा पट्टा, दहीहंडी पावसातच फुटणार
गेले अनेक दिवस पावसाने विश्रांती घेतली होती. मात्र बंगालच्या उपसागरात कमी दाबाचे क्षेत्र निर्माण झाल्यामुळे राज्यात पावसाचा जोर वाढण्याची शक्यता आहे. राज्यातील बहुतांश भागात पुढील दोन – तीन दिवस मुसळधार पाऊस पडण्याची शक्यता आहे, असे अंदाज हवामान विभागाने वर्तविला आहे. मुंबई, ठाणे, पालघरसह रायगड, रत्नागिरी, तसेच सिंधुदुर्ग या जिल्ह्यांमध्येही पुढील दोन दिवस मुसळधार पाऊस पडण्याची शक्यता हवामान विभागाने व्यक्त केली आहे.