मुंबई : मुंबई महानगरपालिकेने शिवडीमधील राम टेकडी मार्ग आणि डब्बेवाला चाळ, परळमधील हिमालया चाळ आणि वडाळा येथील बरकत अली नगर येथे सामुदायिक प्रसाधनगृह बांधण्याचा निर्णय घेतला आहे. या प्रसाधनगृहांच्या पुनर्बांधणीचे भूमिपूजन शालेय शिक्षण मंत्री तथा मुंबई शहर जिल्ह्याचे पालकमंत्री दीपक केसरकर यांच्या हस्ते गुरुवार पार पडले.
मुंबईमधील झोपडपट्टी बहुल विभागांमध्ये लॉट १२ या प्रकल्पांतर्गत वस्ती स्वच्छता कार्यक्रमाचा भाग म्हणून सामुदायिक प्रसाधनगृहांचे पुर्नबांधणी करण्यात येत आहे. मुंबई शहर विभागात एकूण ८६ ठिकाणी सामुदायिक प्रसाधनगृहांची पुर्नबांधणी करण्यात येणार आहे.
परळ, शिवडी आणि वडाळा येथील सामुदायिक प्रसाधनगृह बांधण्याचे काम महानगरपालिकेने हाती घेतले आहे. या कामांचे भूमिपूजन मुंबई शहर जिल्हा पालकमंत्री दीपक केसरकर यांच्या हस्त करण्यात आले. आमदार कालिदास कोळंबकर, आमदार आर. तमील सेल्वन, उपआयुक्त (घनकचरा व्यवस्थापन) चंदा जाधव, उपआयुक्त (परिमंडळ २) रमाकांत बिरादार, सहायक आयुक्त चक्रपाणी अल्ले आदी मान्यवर यावेळी उपस्थित होते.
हेही वाचा : मुंबई : मराठी तरुणाने बदलायला लावले रेल्वेच्या ‘एक्स’ खात्याचे नाव
राम टेकडी मार्ग येथील सामुदायिक प्रसाधनगृहांमध्ये एकूण १९ शौचकुपे, डब्बेवाला चाळीसाठी एकूण २२ शौचकुपे, हिमालया चाळसाठी एकूण ३७ शौचकुपे आणि बरकत अली नगर येथे एकूण ५१ शौचकुपे बांधण्यात येणार आहेत.