मुंबई : मुंबईतील महिला बचत गटांनी तयार केलेल्या वस्तूंचे गुरुवारी महानगरपालिका मुख्यालयात प्रदर्शन भरविण्यात आले. दिवाळीनिमित्त भरविण्यात आलेल्या या प्रदर्शनाला महानगरपालिका आयुक्त व प्रशासक भूषण गगराणी, अतिरिक्त महानगरपालिका आयुक्त डॉ. अश्विनी जोशी यांच्यासह विविध अधिकाऱ्यांनी भेट दिली. महानगरपालिका मुख्यालयातील अधिकारी, कर्मचाऱ्यांनी देखील या प्रदर्शनाला उत्स्फूर्त प्रतिसाद दिला. प्रदर्शनात उटणे, अगरबत्ती, ज्यूट बॅग्ज, इमिटेशन ज्वेलरी, मोत्यांचे दागिने, रांगोळी आदींची विविध ४० स्टॉल्स उभारण्यात आले होते
महिला स्वावलंबी व्हाव्यात, तसेच आर्थिकदृष्ट्या गरजू महिलांना रोजगार मिळावा, यासाठी महानगरपालिकेच्या नियोजन विभागामार्फत महिला बचत गटांना प्रोत्साहन देण्यात येते. याचाच एक भाग म्हणून महिला व बालकल्याण योजना / दीनदयाळ अंत्योदय योजना-राष्ट्रीय उपजीविका अभियान योजनेअंतर्गत महानगरपालिका मुख्यालय इमारतीत गुरुवारी महिला बचत गट निर्मित वस्तूंचे प्रदर्शन भरविण्यात आले होते.
या प्रदर्शनाला महानगरपालिका आयुक्त तथा प्रशासक भूषण गगराणी, अश्विनी जोशी यांच्यासह विशेष कार्य अधिकारी चंद्रशेखर चोरे, विविध वरिष्ठ अधिकाऱ्यांनी भेट दिली. तसेच मुख्यालयातील अधिकारी, कर्मचारी, कामगारांनी प्रदर्शनाला भेट देवून वस्तूंची खरेदी केली.
या प्रदर्शनात एकूण ४० स्टॉल्स थाटण्यात आले होते. उटणे, अगरबत्ती, ज्यूट बॅग्ज, इमिटेशन ज्वेलरी, मोत्यांचे दागिने, रांगोळी, सुवासिक द्रव्ये, ड्रेस, सुशोभीत पणती, विविध प्रकारचे आकर्षक तोरण, आकाश कंदिल, बांबूच्या आकर्षक वस्तू आदींसह खाद्यपदार्थया प्रदर्शनामध्ये मांडण्यात आले होते. या प्रदर्शनाला उत्तम प्रतिसाद मिळाल्याचे संचालक डॉ. प्राची जांभेकर यांनी नमूद केले.
विशेष मुलांनी वेधले लक्ष
महिला बचत गटांच्या या प्रदर्शनात परळ येथील नरेपार्क विशेष मुलांच्या शाळेतील दिव्यांग विद्यार्थी रुद्र जाधव आणि दक्षेष पवार या दोघांचाही स्टॉल होता. या मुलांनी स्वत: साकारलेले आकाश कंदील आणि रंगांनी सजविलेल्या पणत्या विक्रीसाठी ठेवल्या होत्या. गगराणी आणि जोशी यांनी या मुलांचे विशेष कौतुक केले. तसेच त्यांच्याकडून वस्तूही खरेदी केल्या. अधिकाऱ्यांनी साधलेला संवाद आणि केलेल्या कौतुकामुळे मुलांच्या चेहऱ्यावर हास्य फुलले.