अमरावती : पोलीस असल्याची बतावणी करून हातचलाखीने एका व्‍यक्‍तीचे १ लाख २२ हजार रुपयांचे सोन्याचे दागिने लांबविण्यात आल्‍याची घटना राष्ट्रीय महामार्गावरील पहेलवान बाबा हनुमान मंदिरानजीक घडली. या प्रकरणी प्रकाश पुंडलिकराव सुकलेकर रा. अर्जुननगर यांच्या तक्रारीवरून गाडगेनगर पोलिसांनी अज्ञात दोन लुटारूंविरुद्ध गुन्हा दाखल केला आहे.
प्रकाश सुकलेकर हे नागपूर मार्गावर पायी फिरण्‍यासाठी गेले होते. त्यावेळी पहेलवान बाबा हनुमान मंदिरानजीक दोन लुटारू दुचाकीने त्यांच्याजवळ आले. काका सोन्याच्या अंगठ्या काढा, सोने घालून फिरू नका, मी पोलीस आहे, असे म्हणून दोघांनीही त्यांना ओळखपत्र दाखविले. त्यानंतर प्रकाश सुकलेकर यांनी स्वत:कडील तीन अंगठ्या, गोफ आणि लॉकेट असे सुमारे ४१ ग्रॅम सोन्याचे दागिने काढले. त्यावर ते सोने आमच्याकडे द्या, रुमालात बांधून देतो, अशी बतावणी त्या दोन लुटारूंनी केली. त्यामुळे प्रकाश सुकलेकर यांनी जवळील सोने त्या लुटारूंकडे रुमालात ठेवण्यास दिले. लुटारूंनी दागिने घेऊन ते रुमालात बांधल्याचे भासविले. त्यानंतर लुटारूंनी रुमाल प्रकाश सुकलेकर यांना दिला. प्रकाश सुकलेकर यांनी रुमाल उघडून बघितल्यावर त्यांना दागिने दिसले नाही.
हेही वाचा – कंत्राटी नोकरभरती : सरकार खासगी कंपनीच्या घशात घालणार इतके पैसे, वाचून थक्क व्हाल…
दोन्ही लुटारू दुचाकीने तेथून पळून गेले. या घटनेनंतर प्रकाश सुकलेकर यांनी गाडगेनगर ठाणे गाठून तक्रार दाखल केली. तक्रारीवरून पोलिसांनी अज्ञात दोन लुटारूंविरुद्ध गुन्हा दाखल केला असून त्यांचा कसून शोध सुरू आहे.