साताऱ्याचा ‘ढाण्या वाघ’ किरण माने जंगलात अन् अचानक समोर आला वाघ…

विदर्भात आल्यानंतर पहिल्यांदाच त्यांनी बोर व्याघ्रप्रकल्पात पाऊल ठेवले. बोरधरण प्रवेशद्वारातून समोर जात नाही तोच साताऱ्याच्या या ‘ढाण्या वाघा’ला बोर व्याघ्रप्रकल्पातील ‘बीटीआर-३’ म्हणजेच ‘कॅटरिना’ ही वाघीण त्यांच्यासमोर आली. ती एकटीच नव्हती तर तिचे बछडे देखील तिच्यासोबत होते. एकीकडे ‘माने’ यांचे कुटुंबिय तर दुसरीकडे ‘कॅटरिना’चे कुटुंब आणि दोघेही एकाक्षणी समोरासमोर आले.

किरण माने त्यांच्या स्पष्टवक्तेपणाबद्दल ओळखले जातात. त्यांचा हा स्पष्टवक्तेपणा अभ्यासपूर्ण असतो. त्यामुळे समोरच्याला त्यांचे मुद्दे खोडूनच काढता येत नाही. एकीकडे अभिनयाची उंची तर दुसरीकडे लेखणी आणि वाणीही तेवढीच उंच. त्यामुळे त्यांच्या अभिनयाचे आणि लेखणी व वाणीचे चाहतेही तेवढेच अधिक आहेत. समाजमाध्यमावर त्यांची लेखणी तर टीव्हीवर त्यांचा अभिनय कायम गाजत असतो. मात्र, कायम पाय जमिनीवर असणाऱ्या या अभिनेत्यामध्ये कधी ‘सेलिब्रिटी’ दिसून आला नाही. त्यामुळे त्यांची व्याघ्रसफारी ही विशेषच होती.

एरवी ‘सेलिब्रिटी’ म्हटले की त्यांची धाव व्याघ्रदर्शनासाठी ताडोबा-अंधारी व्याघ्रप्रकल्पाकडे असते. त्यामुळे या व्याघ्रप्रकल्पातील वाघही आता ‘सेलिब्रिटी’ झाले आहेत. मात्र, किरण माने यांनी वर्धा जिल्ह्यातील बोर व्याघ्रप्रकल्पाची निवड केली. या व्याघ्रप्रकल्पातील वाघांनीही त्यांना निराश केले नाही.‘कॅटरिना’ नावाच्या वाघिणीने अवघ्या काही मिनिटातच त्यांना दर्शन दिले. तीच्यासोबत तिचे बछडेदेखील होते. पहिल्यांदाच व्याघ्रदर्शन झाल्याने साताऱ्याचा हा ढाण्या वाघ देखील आनंदी झाला आणि पुन्हा याठिकाणी येण्याचा निश्चय केला.