नवी मुंबई : सीएसएमटीहून पनवेलकडे जाणाऱ्या लोकलमध्ये शुक्रवारी (४ ऑक्टोबर) रात्री एक गंभीर प्रसंग घडला. गाडी बेलापूर रेल्वे स्थानकात पोहोचत असतानाच मोटरमनला अचानक अस्वस्थ वाटू लागले. मात्र, परिस्थिती गंभीर असतानाही त्यांनी प्रसंगावधान राखून गाडी थांबवली. त्यामुळे मोठी दुर्घटना टळली.

हार्बर मार्गावरून प्रवास करत असताना रात्री सुमारे ११ वाजता ही घटना घडली. छत्रपती शिवाजी महाराज टर्मिनसकडून (सीएसएमटी) पनवेलच्या दिशेने जाणारी १०.५० ची लोकल रेल्वे स्थानकावर पोहोचताच मोटरमन सी. मोडक यांची प्रकृती बिघडल्याने त्यांना अस्वस्थ वाटू लागले. त्यामुळे त्यांना उलट्यांचा त्रास सुरू झाला. मात्र, अशा अवस्थेत गाडीवर नियंत्रण ठेवणे कठीण जात असल्याने प्रवाशांच्या सुरक्षिततेचा विचार करून त्यांनी त्वरित ब्रेक लावले. गाडी थांबल्यानंतर मोटरमन मोडक यांना बेलापूर रेल्वे स्थानकातच प्राथमिक उपचार देण्यात आले. त्यानंतर त्यांना तात्काळ नवी मुंबईतील एमजीएम रुग्णालयात दाखल करण्यात आले. ते सध्या रुग्णालयात उपचार घेत असून, त्यांची प्रकृती स्थिर असल्याचे डॉक्टरांनी सांगितले आहे.

मुंबईची लोकल ही मुंबईकरांसाठी केवळ रेल्वेसेवा नसून जीवनवाहिनी मानली जाते. दररोज लाखो प्रवासी या गाड्यांमधून प्रवास करतात. अशा गाड्यांमध्ये मोटरमन अथवा अन्य कर्मचाऱ्यांना अचानक अस्वस्थता येण्याचे प्रसंग घडल्यास प्रवाशांमध्येही चिंता वाढते. प्रवासदरम्यान सुरक्षितता आणि कर्मचाऱ्यांच्या आरोग्याबाबत अधिक सजगता आवश्यक असल्याचे मत प्रवाशांकडून व्यक्त केले जात आहे.रेल्वेतील मोटरमनचे काम अत्यंत जबाबदारीचे आणि ताणतणावपूर्ण मानले जाते. दीर्घकाळ ड्युटी, अनियमित वेळापत्रक आणि सतत जागरूक राहावे लागणे या कारणांमुळे शारीरिक व मानसिक थकवा वाढतो. या पार्श्वभूमीवर अशा घटना चिंताजनक मानल्या जात आहेत.

या सर्व घटनेमुळे सीएसएमटीहून पनवेलकडे जाणारी लोकल गाडी बेलापूर येथे २० मिनिटे थांबवावी लागल्याने सीएसएमटी–पनवेल मार्गावरील रेल्वेसेवा काही काळ विस्कळीत झाली होती. प्रवाशांना गैरसोयीचा सामना करावा लागला असला तरी कोणतीही अप्रिय घटना घडली नाही. रेल्वे प्रशासनाने तातडीने दुसऱ्या मोटरमनची नेमणूक करून गाडी पुढे रवाना केली.या प्रसंगामुळे स्थानकात काही काळ गोंधळाचे वातावरण होते. मात्र, मोटरमनच्या प्रसंगावधानामुळे प्रवाशांनी सुटकेचा निश्वास टाकला. प्रवाशांनीही त्यांच्या तत्परतेचे कौतुक केले.दरम्यान, मोटरमनची प्रकृती स्थिर असून त्यांच्यावर नवी मुंबईतील एमजीएम रुग्णालयात पुढील उपचार सुरू असल्याची माहिती मध्यरेल्वेचे मुख्य जनसंपर्क अधिकारी डॉ. स्वप्नील नीला यांनी दिली आहे.