पनवेल : पळस्पे ते जेएनपीटी हा महामार्ग दुचाकीस्वार आणि हलक्या वाहनांसाठी धोकादायक महामार्ग बनला आहे. यंदाच्या वर्षी १ जानेवारी ते जून महिन्यापर्यंत या महामार्गावर पाच जणांचा अपघाती मृत्यू झाल्याची नोंद आहे. पनवेल शहर वाहतूक शाखेच्या विविध प्रयत्नांमुळे विविध महामार्गांवर मागील वर्षीपेक्षा अपघाताचे प्रमाण दुपटीने कमी झाले आहे. परंतु पळस्पे जेएनपीटी महामार्गातील दोष वाहतूक पोलिसांनी राष्ट्रीय महामार्ग प्राधिकरणाला पत्र दिल्यानंतर सुद्धा कमी झालेले नाहीत.

या महामार्गावर मोठ्या प्रमाणात खड्डे असल्याने वाहनांची महामार्गावरील गती मंदावली आहे. काँक्रीटच्या महामार्गावरील खड्डे भरण्यासाठी पेव्हरब्लॉक लावण्याचे काम संथगतीने सुरू आहे. मागील वर्षी पनवेल शहर वाहतूक पोलिसांच्या अखत्यारीत येणा-या विविध महामार्गावर २१ जणांचा अपघाती मृत्यू झाला. यावर्षी ११ मृत्यूंची नोंद झाली. पोलीस विभागाने संबंधित महामार्ग, रस्त्याबाबत अपघातानंतर सूचना केल्यानंतर ज्या प्राधिकरणाच्या अखत्यारीत तो रस्ता आहे त्यांनी तातडीने त्या रस्त्यामधील ते दोष दुरुस्त करणे गरजेचे आहे. मात्र पनवेल शहर वाहतूक पोलिसांच्या सूचनेनंतर पळस्पे ते जेएनपीटी महामार्गावरील मॅरेथाॅन इमारतीसमोरील महामार्गाला जोडणाऱ्या कटविषयी राष्ट्रीय महामार्ग प्राधिकरण तातडीने पावले उचलण्यास तयार नाही.

मागील आठवड्यात रात्री दोन तरुणांचा दुचाकीवरुन जाताना पावसात कमी प्रकाशामुळे दुभाजक न दिसल्याने अपघात झाला. या अपघातामध्ये ऋषिकेश गावडे या तरुणाचा मृत्यू झाला. पनवेल शहर वाहतूक पोलिस विभागाच्या एका अधिकाऱ्याने नाव प्रसिद्ध न करण्याच्या अटीवर दिलेल्या माहितीनुसार मागील अनेक महिन्यांपासून हा दुभाजक काढण्यासाठी राष्ट्रीय महामार्ग प्राधिकरणाला लेखी पत्र अनेकदा दिले आहे. दुभाजक काढून टाकण्यासाठी वेळ लागत असल्यास त्या जागेवर रात्रीच्यावेळी दुभाजक दिसण्यासाठी हायमास्टचे पथदिवे उभारण्याची सूचना केली होती. मात्र अनेक महिने उलटल्यानंतरही प्रस्ताव लालफितीत अडकला आहे.

पनवेल शहर वाहतूक पोलिसांनी दिलेल्या सूचनेप्रमाणे सोलार ब्लिंकर्स लावण्यासाठी संबंधित एजन्सीला ऑर्डर दिली आहे. महामार्गातील खड्डे भरण्यासाठी पेव्हर ब्लॉक लावण्यासाठी दोन वेगळी मजुरांची पथकांकडून काम सुरू आहे. महामार्ग दोषमुक्त कऱण्यासाठी आमचे काम सुरूच असते.यशवंत घोटकर, प्रकल्प संचालक, राष्ट्रीय महामार्ग प्राधिकरण