घरमालकांच्या बैठका घेत करोना नियमांचे पालन करण्याच्या सूचना
पनवेल : पनवेल तालुक्यातील शेतघरांवर नववर्ष स्वागतासाठी दरवर्षी मोठय़ा प्रमाणात पाटर्य़ाचे आयोजन केले जाते. यावर्षी करोनामुळे या ठिकाणी गर्दी होऊ नये व नियमांचे पालन व्हावे यासाठी पोलीस लक्ष ठेवून राहणार आहेत. शेतघर मालकांसमवेत बैठका घेत याबाबतच्या सूचना करण्यात येत आहेत.
पोलीस उपायुक्तांनी सर्वच पोलीस ठाण्यांच्या प्रमुखांना शेतघर मालकांना सूचना देण्याचे आदेश दिले होते. त्यानुसार खांदेश्वर, पनवेल तालुका आणि पनवेल शहर पोलीस ठाण्यांमध्ये या बैठकांचे सत्र सुरू आहे.
परिमंडळ दोनचे उपायुक्त शिवराज पाटील यांनी त्यासाठी विशेष मोहीम हाती घेतली आहे. प्रत्येक वर्षी स्वमालकीच्या शेतघरांवर पार्टी करण्यासाठी कोणासही बंधन नाही, मात्र यावेळी करोना संकटामुळे सरकारने घातलेले नियम पाळून एकत्र येण्याच्या सूचना पोलिसांकडून करण्यात येत आहेत. पालिसांची परवानगी घेऊनच ५० हूून अधिक व्यक्ती एका पार्टीत नसतील याची दक्षता घेण्यात येत आहे. तसेच करोनाच्या इतर नियामांचेही काटेकोर पालन करण्याबाबत सांगितले जात आहे.
नवी मुंबईत चोख बंदोबस्त
नवी मुंबई : राज्यात मंगळवारी रात्रीपासून ५ जानेवारीपर्यंत महानगरपालिका क्षेत्रात रात्री ११ ते पहाटे ६ पर्यंत संचारबंदी लागू करण्यात आल्याने सरत्या वर्षांला निरोप आणि नववर्षांच्या स्वागतासाठी ३१ डिसेंबरच्या मध्यरात्री होणाऱ्या जल्लोषावर पूर्णपणे निर्बंध आले आहेत. त्यामुळे पोलिसांवरील ताण कमी झाला असला तरी नवी मुंबईत चोख बंदोबस्त ठेवण्यात येईल असे पोलीस आयुक्त बिपीनकुमार सिंह यांनी सांगितले.
नवी मुंबई पोलीस आयुक्तालय क्षेत्रात २०२१ च्या स्वागताच्या बंदोबस्ताची सर्व तयारी झालेली आहे. यात करोना संसर्गजन्य नियम उल्लंघन करणाऱ्यांवर कारवाई करण्यात येणार आहे. वाहन चालकांवर ड्रंक अन्ड ड्राइव्हच्या कारवाई करण्यात येतात. यावर्षी संचारबंदी असली तरीही मुख्य रस्त्यांवर पोलीस बंदोबस्त असणार आहेत. सर्व चौकात ब्रेथ अनायझर सहवाहतूक पोलीस तैनात असतील. शीव-पनवेल आणि ठाणे-बेलापूर महामार्गावर पोलिसांची नजर असणार आहे.
३१ डिसेंबर ते १ जानेवारीदरम्यान असणारा बंदोबस्त यावर्षीही असणार आहे. नागरिकांनी सहकार्य करावे. शासनाची नवी नियमावली अद्याप प्राप्त झाल्यानंतर त्यानुसार अधिकचा बंदोबस्त ठेवण्यात येईल.
– बिपीनकुमार सिंह, आयुक्त, नवी मुंबई पोलीस