Photos : बॉक्स ऑफिसवर ‘पावनखिंड’ची जबरदस्त घौडदौड; पहिल्याच आठवड्यात केली तब्बल इतक्या कोटींची कमाई

'पावनखिंड' हा चित्रपट १८ फेब्रुवारी रोजी प्रदर्शित झाला. लेखक - दिग्दर्शक दिग्पाल लांजेकर यांनी संकल्पित केलेल्या आठ चित्रपटांपैंकी हा तिसरा चित्रपट प्रेक्षकांच्या भेटीला आला आहे. छत्रपती शिवाजी महाराजांच्या इतिहासातील महत्त्वाचा अध्याय सांगणारा 'पावनखिंड' हा भव्य-दिव्य आणि महत्त्वाकांक्षी चित्रपट आहे. पावनखिंड या घटनेचा कसून अभ्यास, त्या लढाईची नाट्यमयता, महारांजावर जीव ओवाळून टाकणारे वीर शिलेदार मावळे आणि त्यांची यशोगाथा सांगणारा 'पावनखिंड' हा चित्रपट. शिवचरित्रातील सुवर्णपान असलेल्या पावनखिंडीची गाथा लेखक-दिग्दर्शक दिग्पाल लांजेकरने या चित्रपटात मांडली आहे. पूर्वी घोडखिंड म्हणून ओळखल्या जाणाऱ्या ठिकाणी बाजीप्रभूंनी आपल्या प्राणांची आहुती देत गनिमांची वाट रोखून धरत पराक्रमाची शर्थ केली होती. बाजीप्रभूंच्या पवित्र रक्ताने पावन झाल्याने या खिंडीला पुढे 'पावनखिंड' नाव पडलं. हा चित्रपट प्रेक्षकांना भावला असून तिकीटबारीवर याची जोरदार कमाई सुरु आहे. पहिल्या आठवड्यात या चित्रपटाने १० कोटी रुपयांचा गल्ला जमवला आहे. पहिल्याच दिवशी बॉक्स ऑफिसवर या चित्रपटाचं कलेक्शन १.१५ कोटी रुपये एवढं होतं. शनिवारी २.०५ कोटी रुपये व रविवारी ३ कोटी रुपयांचा गल्ला या चित्रपटाने जमवला. संपूर्ण महाराष्ट्रात या चित्रपटाला १९१० स्क्रिन मिळाल्या. मृणाल कुलकर्णी, प्राजक्ता माळी, चिन्मय मांडलेकर, अंकित मोहन, क्षिती जोग, अजय पूरकर, समीर धर्माधिकारी, शिवराज वायचळ यांसारख्या मातब्बर कलाकारांनी 'पावनखिंड'मध्ये भूमिका साकारल्या आहेत. सध्या सगळीकडेच हा चित्रपट चर्चेत आहे. (सर्व फोटो सौजन्य : इन्स्टाग्राम)