Photos : ‘KGF 2’मधील रॉकी भाईच्या गर्लफ्रेण्डबद्दल खास गोष्टी; जाणून घ्या अभिनेत्री श्रीनिधी शेट्टीबद्दल

दाक्षिणात्य अभिनेता यश मुख्य भूमिकेत असलेला 'केजीएफ २' हा चित्रपट बॉक्स ऑफिसवर सध्या धुमाकूळ घालतोय. 'केजीएफ' या दाक्षिणात्य चित्रपटाचा सिक्वेल असणारा हा चित्रपट १४ एप्रिलला प्रदर्शित झाला. पहिल्याच आठवड्यात 'केजीएफ २' या चित्रपटाने २६८.६३ कोटींची कमाई केली आहे. 'केजीएफ २' चा ट्रेलर प्रदर्शित झाल्यापासूनच चित्रपटाबद्दल चाहत्यांच्या मनात उत्सुकता होती. 'केजीएफ २' रॉकिंग स्टार यश या चित्रपटात रॉकी भाईची भूमिका साकारत आहे. या चित्रपटातील त्याची भूमिका लक्षवेधी ठरत आहे. 'केजीएफ २' चित्रपटातील रॉकी भाईच्या गर्लफ्रेण्डची सोशल मीडियावर बरीच चर्चा आहे. दाक्षिणात्य अभिनेत्री श्रीनिधी शेट्टीने या चित्रपटात रॉकी भाईची गर्लफ्रेण्ड रिनाची भूमिका साकारली आहे. रॉकी भाईवर जिवापाड प्रेम करणारी रिना एका गॅंगस्टरची मुलगी आहे. 'केजीएफ' हा श्रीनिधी शेट्टीचा पहिलाच चित्रपट आहे. या चित्रपटाने श्रीनिधीला सिनेसृष्टीत एक ओळख मिळवून दिली. श्रीनिधीने मॉडलिंग क्षेत्रातून आपल्या करिअरची सुरुवात केली होती. 'मिस दिवा २०१६' ही सौंदर्य स्पर्धा जिंकून ती पहिल्यांदा प्रकाशझोतात आली होती. त्यानंतर श्रीनिधीने 'मिस सुपरनॅशनल २०१६' हा किताब देखील पटकावला. हा किताब नावावर करणारी श्रीनिधी दुसरी भारतीय मॉडेल आहे. याव्यतिरिक्त श्रीनिधीने ‘मिस साउथ इंडिया’, ‘मिस कर्नाटक’, ‘मिस ब्यूटीफुल स्माइल’ असे अनेक किताब आपल्या नावावर केले आहेत. श्रीनिधीने 'मिस इंडिया २०१७' या स्पर्धेतही भाग घेतला होता. परंतु त्याच वेळी तिला 'केजीएफ' या चित्रपटात काम करण्याची संधी मिळाली. त्यामुळे मॉडलिंग अर्धवट सोडून तिनं सिनेसृष्टीत पदार्पण करण्याचा निर्णय घेतला. पहिलाच चित्रपट सुपरहिट ठरल्यानंतर श्रीनिधी शेट्टी दाक्षिणात्य सिनेसृष्टीतील एक नामांकित अभिनेत्री म्हणून ओळखली जाऊ लागली. 'केजीएफ' चित्रपटामुळे प्रकाशझोतात आलेल्या श्रीनिधीचा चाहता वर्गदेखील मोठा आहे. श्रीनिधी शेट्टीचे इन्स्टाग्रामवर १.७ मिलियन फॉलोवर्स आहेत. सोशल मीडियावरून श्रीनिधी चाहत्यांच्या संपर्कात राहण्याचा प्रयत्न करते. 'केजीएफ २' नंतर आता श्रीनिधी 'कोबरा' या चित्रपटातून प्रेक्षकांच्या भेटीला येणार आहे. (सर्व फोटो : श्रीनिधी शेट्टी/ इन्स्टाग्राम)