Photos: ‘महाराणी सोयराबाई’….’सरसेनापती हंबीरराव’ चित्रपटातील अभिनेत्री श्रुती मराठेचा फर्स्ट लूक पाहिलात का?

लेखक, दिग्दर्शक प्रविण तरडे यांच्या आगामी 'सरसेनापती हंबीरराव' या भव्य ऐतिहासिक चित्रपटाची सध्या सर्वत्र जोरदार चर्चा सुरू आहे. हिंदवी स्वराज्याचे संस्थापक छत्रपती शिवाजी महाराज आणि छत्रपती संभाजी महाराज यांचे सरसेनापती होण्याचा बहुमान मिळविणारे हंबीरराव मोहिते यांची ख्याती अख्ख्या महाराष्ट्राला माहित आहे. सरसेनापती हंबीरराव मोहिते यांचा जीवनप्रवास लवकरच रुपेरी पडद्यावर उलगडला जाणार आहे. हंबीरराव मोहिते हे छत्रपती शिवाजी महाराज आणि छत्रपती संभाजी महाराज यांचे सेनापती होते. हंबीरराव यांनी आपल्या चाणाक्ष बुद्धीमत्तेच्या जोरावर स्वराज्याला श्रीमंती मिळवून देण्यास मदत केली. हंबीरराव मोहिते यांच्या नजरेतून मराठा साम्राज्य या चित्रपटात दिसणार आहे. या भव्य ऐतिहासिक चित्रपटात तगडी स्टारकास्ट आहे. अभिनेत्री श्रुती मराठे या चित्रपटात महत्त्वपूर्ण भूमिका साकारणार आहे. 'सरसेनापती हंबीरराव' चित्रपटात श्रुती 'महाराणी सोयराबाई' यांची भूमिका साकारणार आहे. श्रुतीने अनेक गाजलेल्या चित्रपटांमध्ये काम केले आहे. 'महाराणी सोयराबाई' यांच्या भूमिकेत श्रुतीला पाहण्यासाठी चाहते उत्सुक आहेत. 'सरसेनापती हंबीरराव' हा मराठीमधील सर्वाधिक महागडा चित्रपट आहे. हा भव्य ऐतिहासिक मराठी चित्रपट २७ मे रोजी प्रदर्शित होणार आहे. मराठी मनोरंजन विश्वात काम करण्याबरोबच श्रुतीने दाक्षिणात्य चित्रपटातही काम केले आहे. (सर्व फोटो सौजन्य : इन्स्टाग्राम)