Photos : सिद्धु मूसेवालांना गाड्यांसोबत होता बंदूक चालविण्याचा शौक; कॅनडातील आलिशान घर आणि कार कलेक्शन पाहून थक्क व्हाल

प्रसिद्ध पंजाबी गायक आणि काँग्रेस नेते सिद्धू मूसेवाला यांची २९ मेला गोळ्या झाडून हत्या करण्यात आली. पंजाब सरकारने सिद्धू मूसेवाला यांची सुरक्षा काढून घेतल्याच्या दुसऱ्याच दिवशी त्यांची हत्या झाल्याने खळबळ उडाली आहे. सिद्धू मूसेवाला यांचं खरं नाव शुभदीप सिंग सिद्धू असं होतं. पंजाबमधील मानसा जिल्ह्यातील मूसा गावात जन्मलेल्या मूसेवाला यांनी गीतकार म्हणून आपल्या करिअरची सुरुवात केली होती. गायकासोबतच ते उत्तम अभिनेता देखील होते. २०१७ मध्ये, त्यांनी त्यांचं पहिलं गाणं 'सो हाय' रिलीज केलं होतं. त्यांच्या अनेक हिट असलेल्या गाण्यांपैकी 'लायसन्स' हे गाणं खूप लोकप्रिय ठरलं होतं. गाण्याप्रमाणेच मूसेवाला बंदूक आणि महागड्या गाड्यांचे शौकीन होते. त्यांच्या गाण्यातील बंदूकीच्या दृश्यांमुळे त्यांच्यावर हिंसाचाराला प्रोत्साहन देत असल्याचा ठपका ठेवण्यात आला होता. याशिवाय त्यांचे एके-४७ रायफलने गोळीबार करतानाचे व्हिडीओ देखील व्हायरल झाले होते. मूसेवाला यांनी पंजाब विधानसभा निवडणुकीपूर्वी काँग्रेसमध्ये प्रवेश केला होता. पंजाब काँग्रेसचे प्रमुख असलेल्या नवज्योतसिंग सिद्धू यांनी मूसेवालांना तरुण पिढीचे नेतृत्व आणि आंतरराष्ट्रीय व्यक्तिमत्व म्हणून संबोधले होते. काँग्रेसचे नेते आणि अनेकदा चर्चेत आलेले मूसेवाला शानदार आयुष्य जगायचे. कॅनडामध्ये त्यांचं आलिशान घर आहे. तसंच, त्यांच्याकडे अनेक महागड्या गाड्यांचे कलेक्शनदेखील होते. मीडिया रिपोर्टनुसार, मूसेवाला यांच्याकडे टोयोटो फॉर्च्यूनर, जीपसारख्या आलिशान गाड्या होत्या. याशिवाय रेंज रोवर, मर्सिडिज या महागड्या गाड्यांमधून ते फिरायचे. सिद्धू मूसेवाला यांच्या गाण्याचे लाखो चाहते आहेत. त्यांच्या लाइव्ह कॉन्सर्टसाठी चाहते गर्दी करायचे. एका कॉन्सर्टसाठी मूसेवाला २० लाख रुपये मानधन घ्यायचे. तर एका गाण्यासाठी ते ६ ते ८ लाख रुपये मानधन घ्यायचे, अशी माहिती आहे. रिपोर्टनुसार, मुसेवाला एका महिन्याला जवळपास ३५-४० लाख रुपये कमवायचे. जूनमध्ये मुसेवला वर्ल्ड टूर ट्रिपसाठी जाणार होते. परंतु, त्या आधीच त्यांची निर्घुणपणे हत्या करण्यात आली. (सर्व फोटो : सिद्धू मूसेवाला/ इन्स्टाग्राम)