Photos : ‘हम रहें या न रहें कल’ ते ‘यारों ये दोस्ती’…केके यांच्या ‘या’ गाण्यांनी तरुणाईला लावलं होतं वेड

बॉलिवूडमधील प्रसिद्ध गायक कृष्णकुमार कुन्नथ म्हणजेच केके यांचं ३१ मे रोजी रात्री निधन झालं आहे. कोलकात्यामध्ये लाइव्ह कॉन्सर्टदरमध्ये अस्वस्थ वाटू लागल्यानंतर त्यांना हृदयविकाराचा झटका आला. रुग्णालयात दाखल करण्यापुर्वीच त्यांचं निधन झालं. ते ५३ वर्षांचे होते. केके यांनी त्यांच्या मंत्रमुग्ध करणाऱ्या आवाजाने आजवर जवळपास ५०० गाणी गाऊन रसिकांचं मनोरंजन केलं. त्यांचं असं अचानक जाणं हा चाहत्यांसाठी मोठा धक्का आहे. ९०च्या दशकात केके यांच्या गाण्यांनी प्रेक्षकांना अक्षरश: वेड लावलं होतं. केके यांच्या कॉन्सर्टला चाहते गर्दी करायचे. 'हम रहे या ना रहे कल' हे त्यांचं कॉन्सर्टमध्ये गायलेलं शेवटचं गाणं ठरलं. हे गाणं ९०च्या दशकातील कॉलेजमधील तरुणाईच्या ओठांवर असायचं. 'यारों ये दोस्ती बडी हि हसीन है' हे केके यांच्या मैत्रीवर आधारित असणाऱ्या गाण्याने प्रत्येकाच्याच मनात घरं केलं होतं. 'हम दिल दे चुके सनम' या बॉलिवूड चित्रपटातील 'तडप तडप के इस दिल' हे गाणं प्रचंड गाजलं होतं. ऐश्वर्या राय बच्चन आणि सलमान खान यांच्यावर चित्रित झालेलं हे गाणंदेखील केके यांनीच गायलं होतं. बॉलिवूड अभिनेता जॉन अब्राहम आणि बिपाशा बासू यांच्या 'जिस्म' या चित्रपटातील 'आवारापन बंजारापन' हे केके यांचं गाणं आजही अनेकांचं आवडतं गाणं आहे. 'तू आशिकी है' हे गाणं आजही तरुणाईच्या ओठांवर असतं. 'गॅंगस्टर' चित्रपटातील 'तू ही मेरी शब है' हे प्रेमावरील गाणं अनेकांच्या स्टेटसला आजही असतं. केके यांचं 'मेरा पहेला पहेला प्यार' हे रोमॅंटिक गाणं कित्येकांचं आवडतं आहे. केके त्यांच्या गाण्यांमधून चाहत्यांच्या मनात कायम अजरामर राहतील. (सर्व फोटो : केके/ इन्स्टाग्राम)