वयामध्ये १८ वर्षांचा फरक, कुटुंबियांचा विरोध; वाचा अशोक सराफ आणि निवेदिता यांची खास लव्हस्टोरी

विनोदी भूमिका साकारत आपल्या लाजवाब टायमिंगने प्रेक्षकांना खळखळून हसवणारे अभिनेते म्हणून अशोक सराफ यांना ओळखले जाते. मराठी चित्रपट व नाट्यसृष्टीतील ज्येष्ठ अभिनेते अशोक सराफ यांचा आज ७५ वा वाढदिवस आहे. अशोक सराफ यांनी यंदा वयाची पंचाहत्तरी पूर्ण केली असून त्यांच्या चित्रपटसृष्टीतील कारकिर्दीला पन्नास वर्षे पूर्ण झाली आहेत. आजही सिनेसृष्टीतील अनेक कलाकार त्यांना 'अशोक मामा' याच नावाने हाक मारतात. अशोक सराफ आणि निवेदिता सराफ यांची जोडी ही नेहमीच चर्चेत असते. त्यांच्या जोडीला ऑनस्क्रीनसह ऑफस्क्रिनवरही प्रेक्षकांनी भरभरुन प्रेम केले. या दोघांची लव्हस्टोरी आणि लग्नाचा किस्सा त्याकाळात फार गाजला होता. अशोक सराफ आणि निवेदिता यांच्या वयामध्ये तब्बल १८ वर्षांचे अंतर आहे. मात्र त्यांच्या प्रेमात वयाचा अडसर कधीच आला नाही. अशोक सराफ यांचा 'दोन्ही घरचा पाहुणा' हा पहिला चित्रपट प्रदर्शित झाला तेव्हा निवेदिता या अवघ्या ६ वर्षांच्या होत्या. अशोक आणि निवेदिता यांची पहिली भेट एका नाटकाच्या प्रयोगादरम्यान झाली होती. निवेदिता यांच्या वडिलांनी आपल्या मुलीची ओळख अशोक सराफ यांच्यासोबत करुन दिली होती. त्यानंतर निवेदिता यांनी अभिनय क्षेत्रात पदार्पण केले. अशोक सराफ आणि निवेदिता यांनी अनेक चित्रपटात एकत्र काम केले. पण 'नवरी मिळे नवऱ्याला' हा चित्रपट त्यांच्यासाठी खास ठरला. या चित्रपटाच्या शूटींगदरम्यान त्या दोघांच्या मैत्रीचे रुपांतर प्रेमात झाले. यानंतर त्यांनी लग्न करण्याचा निर्णय घेतला. पण निवेदिता यांच्या कुटुंबियांना हे लग्न मान्य नव्हते. 'आपल्या मुलीने चित्रपट क्षेत्रातील व्यक्तीशी लग्न करू नये', अशी तिच्या आईची इच्छा होती. त्यामुळे या लग्नाला चांगलाच विरोध झाला. पण निवेदिता यांची मोठी बहीण डॉ मीनल परांजपे यांनी पुढाकार घेत या लग्नासाठी कुटुंबाकडून परवानगी मिळवली. त्यानंतर अशोक सराफ आणि निवेदिता यांनी गोव्यातील मंगेशीच्या देवळात जाऊन विधीवत लग्न केले. या ठिकाणी लग्न करण्यामागे त्यांची दोन कारणे होती. पहिले म्हणजे मंगेशी हे सराफ यांचे कुलदैवत होते तर दुसरे म्हणजे याच मंदिरामध्ये या दोघांनी प्रेमाच्या आणि लग्नाच्या आणाभाका घेतल्या होत्या. त्यामुळे याच ठिकाणी लग्न करायचे असे त्यांनी ठरवले होते. त्यांचे लग्न अगदी साधेपणाने पार पडले. मात्र त्यांच्या लग्नाची बातमी सर्व ठिकाणी व्हायरल झाली होती. लग्नानंतर निवेदिता सराफ यांनी अभिनयातून ब्रेक घेतला. त्यांनी त्यांचा एकुलता एक मुलगा अनिकेत सराफ याच्या पालनपोषणाची जबाबदारी घेतली. तर अशोक सराफ यांनी अभिनय कारकिर्दीवर लक्ष केंद्रीत करत अनेक चित्रपटात उत्कृष्ट भूमिका साकारल्या. (सर्व फोटो - निवेदिता सराफ/इन्स्टाग्राम)